ભાવનગર જિલ્લાના વલ્લભીપુર વિસ્તારમાંથી એક હૃદયદ્રાવક સમાચાર સામે આવ્યા છે. વલ્લભીપુરના પાટણા ગામ નજીક હાઇવે પર એક ભયાનક અકસ્માત સર્જાયો હતો, જેમાં બે યુવકોનાં ઘટનાસ્થળે જ કમકમાટીભર્યા મોત નીપજ્યા છે. આ અકસ્માત એટલો ગંભીર હતો કે, બંને યુવકોના મોતે સમગ્ર વિસ્તારમાં શોકનું મોજુ ફેલાવી દીધું છે.
આઈશર ગાડીની પાછળ બાઈક અથડાતાં સર્જાયો અકસ્માત
પ્રાપ્ત વિગતો અનુસાર, વલ્લભીપુરના પાટણા ગામ નજીક હાઈવે પર પૂરઝડપે જઈ રહેલી એક આઈશર ગાડીની પાછળ અચાનક એક બાઈક ધડાકાભેર અથડાયું હતું. ટક્કર એટલી જોરદાર હતી કે બાઈક સવાર બંને યુવકો ગંભીર રીતે ઘાયલ થઈ ગયા હતા અને રસ્તા પર ફંગોળાયા હતા.
ચોટીલા ચામુંડા માતાજીના દર્શન કરી પરત ફરતા હતા યુવકો
અકસ્માતમાં જીવ ગુમાવનાર બંને યુવકો તળાજા તાલુકાના મથાવડા ગામના રહેવાસી હોવાનું સામે આવ્યું છે. મૃતકોની ઓળખ કિરણ સોલંકી અને અરુણ બારૈયા તરીકે થઈ છે. આ બંને યુવકો પવિત્ર ચોટીલા ધામે ચામુંડા માતાજીના દર્શન કરવા માટે ગયા હતા અને ત્યાંથી પોતાના વતન પરત ફરી રહ્યા હતા, તે દરમિયાન રસ્તામાં જ આ આફત આવી પડી હતી.
ઘટના સ્થળે જ કમકમાટીભર્યા મોતથી ગામમાં શોક
અકસ્માતની જાણ થતા જ સ્થાનિક લોકો અને પોલીસ કાફલો ઘટના સ્થળે દોડી આવ્યા હતા. જોકે, ગંભીર ઇજાઓ થવાને કારણે કિરણ સોલંકી અને અરુણ બારૈયા બંનેના ઘટના સ્થળે જ પ્રાણ પંખેરૂ ઉડી ગયા હતા. એકસાથે બે યુવકોના અચાનક અવસાનથી મથાવડા ગામમાં અને મૃતકોના પરિવારજનોમાં ભારે આક્રંદ છવાઈ ગયો છે.
આ પણ વાંચો: Bhavnagarના ગારીયાધારમાં જૂની અદાવતમાં હત્યા, વિરડી ગામના આણંદભાઈ કંટારીયા પર 5 શખ્સોનો ખૂની હુમલો!
