Railway News : ભાવનગર મંડળમાંથી પસાર થતી ભાવનગર–બાન્દ્રા સાપ્તાહિક સ્પેશિયલ ટ્રેન હવે 25 ડિસેમ્બર સુધી ચાલશે

પશ્ચિમ રેલવે દ્વારા યાત્રિયોની સુવિધા માટે ભાવનગર મંડળના ભાવનગર ટર્મિનસ સ્ટેશનથી દર ગુરુવારે ચાલતી ભાવનગર–બાન્દ્રા સાપ્તાહિક સ્પેશિયલ ટ્રેનના ફેરાનો વિસ્તરણ કરવાનો નિર્ણય લેવાયો છે. ભાવનગર મંડળના વરિષ્ઠ મંડળ વાણિજ્ય પ્રબંધક અતુલ કુમાર ત્રિપાઠી અનુસાર ટ્રેન નંબર 09207 બાન્દ્રા ટર્મિનસ–ભાવનગર ટર્મિનસ સ્પેશિયલ, જેને અગાઉ 15 ઑગસ્ટ, 2025 સુધી અધિસૂચિત કરવામાં આવી હતી, હવે તેને 26 ડિસેમ્બર, 2025 સુધી વધારી દેવામાં આવી છે.

ભાવનગર ટર્મિનસ–બાન્દ્રા ટર્મિનસ સ્પેશિયલ ટ્રેન

આ ટ્રેન બાન્દ્રા ટર્મિનસ સ્ટેશનથી દર શુક્રવારે સવારે 09.30 કલાકે પ્રસ્થાન કરે છે અને તે જ દિવસે રાત્રે 23.45 કલાકે ભાવનગર ટર્મિનસ પહોંચે છે. તે જ રીતે, ટ્રેન નંબર 09208 ભાવનગર ટર્મિનસ–બાન્દ્રા ટર્મિનસ સ્પેશિયલ, જેને અગાઉ 14 ઑગસ્ટ, 2025 સુધી જાહેર કરવામાં આવી હતી, હવે તેને 25 ડિસેમ્બર, 2025 સુધી વધારી દેવામાં આવી છે. આ ટ્રેન ભાવનગર ટર્મિનસ સ્ટેશનથી દર ગુરુવારે બપોરે 14.50 કલાકે પ્રસ્થાન કરે છે અને બીજા દિવસે સવારે 06.00 કલાકે બાન્દ્રા ટર્મિનસ પહોંચે છે.

મુસાફરો આજથી ટિકિટ બુકિંગ કરાવી શકશે

ટ્રેન નંબર 09208/09207 ની બુકિંગ 20 ઑગસ્ટ, 2025 (બુધવાર)થી તમામ પીઆરએસ કાઉન્ટર અને આઈઆરસીટીસી વેબસાઈટ પર શરૂ થશે. આ ટ્રેનના સ્ટોપેજ, સમય અને સંરચના અંગેની વિગતવાર માહિતી માટે મુસાફરો કૃપા કરીને વેબસાઈટ www.enquiry.indianrail.gov.in પર અવલોકન કરી શકે છે.