છોટાઉદેપુર જિલ્લાની વસેડી ગ્રામ પંચાયતના લોકાર્પણ કાર્યક્રમમાં ભાજપના અગ્રણી નેતાઓની ખાસ ઉપસ્થિતિ વચ્ચે રાજ્યસભાના સાંસદ મુકેશ રાઠવા દ્વારા આપવામાં આવેલા એક આક્રમક નિવેદનને કારણે રાજકારણમાં ભારે ગરમાવો આવી ગયો છે.આગામી 2027ની વિધાનસભા ચૂંટણીના એંધાણ વચ્ચે સાંસદે જાહેર મંચ પરથી વિરોધી નેતાઓ ઉપર આકરા પ્રહારો કર્યા હતા.વિરોધીઓને આડેહાથ લેતા મુકેશ રાઠવાએ ચેતવણી આપતા જણાવ્યું હતું કે,તમને ઘરભેગા કરવાની વાત તો દૂર રહી પરંતુ અમે તમને તમારા ઘરમાંથી પણ બહાર નહીં નીકળવા દઈએ.
તુમકો ક્યા લગતા હૈ, યે નેપાળ કી સરકાર હૈ?
સાંસદે ઉમેર્યું હતું કે, વિરોધીઓ હવે કોકરોચની જેમ બહાર આવીને વિકાસની વાતો કરી રહ્યા છે અને દિલ્હીથી માંડીને આપણા સ્થાનિક વિસ્તાર સુધી આંદોલનો કરવા નીકળી પડ્યા છે.વિરોધીઓની આ પ્રકારની રાજકીય હિલચાલ સામે લાલ આંખ કરીને તેમણે ફિલ્મી અંદાજમાં લલકાર કરતા જાહેર મંચ પરથી કહ્યું હતું કે, તુમકો ક્યા લગતા હૈ, યે નેપાળ કી સરકાર હૈ? બાંગ્લાદેશ કી સરકાર હૈ? તુમકો ક્યા લગતા થા યે શ્રીલંકા કી સરકાર હૈ? યે મોદી કી સરકાર હૈ આતંકી ઔર દેશદ્રોહી કો ઘર મેં ઘૂસ કે મારેંગે.