અમદાવાદ શહેરમાંથી ડ્રગ્સના દૂષણને નાબૂદ કરવા માટે હાથ ધરાયેલી ઝુંબેશ અંતર્ગત નરોડા પોલીસે એક મોટી અને સફળ કાર્યવાહી કરી છે. પોલીસે નરોડા GIDC અને નાના ચિલોડા વિસ્તારમાંથી રૂ. 1.17 કરોડથી પણ વધુની બજાર કિંમત ધરાવતું 234 ગ્રામ જેટલું અત્યંત કિંમતી કોકેઈન ડ્રગ્સ ઝડપી પાડી આંતરરાજ્ય ડ્રગ્સ નેટવર્કનો પર્દાફાશ કર્યો છે. આ મામલે પોલીસે રાજસ્થાનના એક શખ્સની રંગેહાથ ધરપકડ કરી છે, જ્યારે આ ગુનામાં સંડોવાયેલા અન્ય બે આરોપીઓ પોલીસને ચકમો આપીને ફરાર થઈ જવામાં સફળ રહ્યા છે.
234 ગ્રામ કોકેઈનનો જથ્થો મળી આવ્યો
મળતી ચોક્કસ બાતમીના આધારે નરોડા પોલીસની ટીમે નાના ચિલોડા અને નરોડા GIDC નજીકથી વોચ ગોઠવી હતી. વોચ દરમિયાન શંકાસ્પદ હાલતમાં મળી આવેલા હરેશ સૈન નામના શખ્સને અટકાવીને તેની તલાશી લેતાં તેની પાસેથી 234 ગ્રામ કોકેઈનનો જથ્થો મળી આવ્યો હતો. પોલીસની પ્રાથમિક પૂછપરછમાં ઝડપાયેલો આરોપી મૂળ રાજસ્થાનનો રહેવાસી હોવાનું અને તે ખાનગી ટ્રાવેલ્સની બસ મારફતે આ ડ્રગ્સનો જથ્થો લઈને અમદાવાદ પહોંચ્યો હોવાનું સામે આવ્યું છે.