અમદાવાદની ભદ્ર કોર્ટમાં ફરજ બજાવતા આસિસ્ટન્ટ ક્લાર્ક અશોકભાઈ માધવલાલ પટેલને લાંચ લેતા એસીબી દ્વારા રંગે હાથે ઝડપી લેવામાં આવ્યા છે. આરોપી અશોકભાઈ સીટી સેશન્સ કોર્ટના અપીલ વિભાગમાં ફરજ બજાવે છે. તેમણે એક ફરિયાદી પાસે તેમના કેસમાં તરફેણમાં ચુકાદો અપાવવાના બદલામાં ગેરકાયદેસર રીતે લાંચની માંગણી કરી હતી, જે બાદ આ સમગ્ર મામલે એસીબી દ્વારા છટકું ગોઠવવામાં આવ્યું હતું.
કોર્ટ પરિસરમાં ભારે ચકચાર મચી જવા પામી
લાંચનો સ્વીકાર કરતા જ અશોકભાઈ માધવલાલ પટેલને એસીબીની ટીમે પકડી પાડતા કોર્ટ પરિસરમાં ભારે ચકચાર મચી જવા પામી છે. સરકારી કર્મચારી હોવા છતાં પોતાની સત્તાનો દુરુપયોગ કરી લાંચ માંગનારા આ ક્લાર્ક સામે હવે કાયદેસરની કાર્યવાહી હાથ ધરવામાં આવી છે. આ ઘટનાએ ન્યાયતંત્ર સાથે સંકળાયેલા વહીવટી વિભાગોમાં પણ ભ્રષ્ટાચારને લઈને ગંભીર સવાલો ઊભા કર્યા છે.