Ahmedabad News: જે મકાનમાં હાથ ફેરો કર્યો ત્યાં રહી ગયેલા ફિંગર પ્રિન્ટ ભારે પડ્યા, જાણો પોલીસે કેવી રીતે ચોરને પકડ્યો

રાજ્યમાં ચોરીના કિસ્સાઓ મોટા ભાગે રાતના સમયે બનતા હોય છે. અમદાવાદ પોલીસે એક એવા ચોરને ઝડપ્યો છે જે ધોળા દિવસે ચોરીના ગનાને અંજામ આપતો હતો. આ ચોર વિરૂદ્ધ માત્ર ગુજરાત નહીં અન્ય રાજ્યોમાં પણ ફરિયાદો નોંધાઈ ચૂકી છે. તે ચોરી કરતા પહેલા તે ચોક્કસ વિસ્તારને ટાર્ગેટ કરતો હતો અને ત્યાર બાદ આ વિસ્તારમાં જઈને રેકી કરતો હતો. રેકી કર્યા બાદ ચોરીને અંજામ આપતો હતો.

અમદાવાદમાં ચોરી કરનાર મુંબઈથી પકડાયો

અમદાવાદમાં કાલુપુર અને ગાયકવાડ હવેલી વિસ્તારમાં ચોરીની ઘટનાઓ વધી હતી. પોલીસે આ ઘટનાઓની તપાસ કરતાં એક મકાનમાં ચોરીનો બનાવ બન્યો હતો તે મકાનમાં કાચ પરથી ફિંગર પ્રિન્ટ મળી આવ્યા હતાં. પોલીસે આ ફિંગર પ્રિન્ટને એફએસએલમાં મોકલ્યા હતાં. તેને મેચ કરતાં અગાઉ ચોરીને અંજામ આપી ચૂકેલા સફી ઉર્ફે સલીમના ફિંગર પ્રિન્ટ હોવાનું સામે આવ્યું હતું. પોલીસે આ આરોપીની માહિતી મેળવતા તે મુંબઈમાં હોવાનું જાણવા મળ્યું હતું. પોલીસની એક ટીમ મુંબઈ રવાના થઈ હતી અને આરોપીને ઝડપી પાડ્યો હતો.

તેણે આજ દિન સુધી અમદાવાદમાં રોકાણ કર્યું નથી

પોલીસે આરોપીની પુછપરછ કરતાં તેણે કહ્યું હતું કે, તે નાનપણથી જ ચોરી કરવાની ટેવ ધરાવે છે. તે મુંબઈમાં રસોઈયા તરીકે અલગ અલગ જગ્યાઓ પર નોકરી કરતો હતો અને આ દરમિયાન તેને જુગારની લત લાગી હતી. જુગાર રમવા પૈસાની જરૂર હોવાથી તે ચોરીના રવાડે ચઢ્યો હતો. તેણે છેલ્લા છ મહિનામાં ગુજરાતમાં અલગ અલગ જગ્યાઓ પર ચોરીને અંજામ આપ્યા છે. તે મુંબઈથી સવારે ટ્રેનમાં બેસીને અમદાવાદ આવતો હતો અને ત્યારબાદ આસપાસના વિસ્તારમાં બંધ મકાનને ટાર્ગેટ કરીને ચોરી કરીને ફરી ટ્રેનમાં બેસીને મુંબઈ નીકળી જતો હતો. તેણે આજ દિન સુધી અમદાવાદમાં રોકાણ કર્યું નથી.