અમદાવાદની પ્રતિષ્ઠિત આઈઆઈએમ (IIM) સંસ્થાના પરિસરમાં યુવતીની છેડતીનો ચોંકાવનારો કિસ્સો સામે આવ્યો છે. ઓનલાઈન ઓર્ડર કરાયેલું ફૂડ ડિલિવરી આપવા માટે આવેલ એક યુવકે ગ્રાહક યુવતી સાથે અસભ્ય વર્તન કર્યું હતું. ફૂડ પાર્સલ આપતી વખતે યુવકની દાનત બગડી હતી અને તેણે યુવતીની છેડતી કરવાનો પ્રયાસ કર્યો હતો, જેનાથી કેમ્પસ અને આસપાસના વિસ્તારમાં ભારે સનસનાટી મચી ગઈ છે.
યુવતી સામે બિભસ્ત શબ્દો ઉચ્ચારીને અસભ્ય વર્તન કર્યું
ફૂડ ડિલિવરી કરવા આવેલા યુવકે ન કેવળ છેડતી કરી પરંતુ યુવતી સામે અત્યંત બિભસ્ત અને અશોભનીય શબ્દો બોલીને તેનું માનભંગ કરવાનો પ્રયાસ કર્યો હતો. અચાનક બનેલી આ ઘટનાથી યુવતી સ્તબ્ધ થઈ ગઈ હતી. આરોપી યુવકનું આ પ્રકારનું હીન કૃત્ય સામે આવતાં જ ભોગ બનનાર યુવતીએ હિંમત દાખવીને તાત્કાલિક સમગ્ર મામલે વસ્ત્રાપુર પોલીસ મથકનો સંપર્ક સાધ્યો હતો.