અમદાવાદ મહાનગરપાલિકા (AMC) ના આરોગ્ય વિભાગે નાગરિકોના સ્વાસ્થ્ય સાથે ચેડાં કરતા વેપારીઓ સામે લાલ આંખ કરી છે. મનપાની આરોગ્ય ટીમે લાંભા-પીપળજ રોડ પર આવેલી 'મમતા એગ્રો પ્રોટીન' નામની કંપનીમાં અચાનક દરોડો પાડ્યો હતો. આ કંપની ખાદ્ય તેલના રીપેકિંગનું કામ કરતી હતી, જ્યાં મોટા પાયે અનિયમિતતાઓ અને અસ્વચ્છતા જોવા મળી હતી.
જૂના વપરાયેલા ડબ્બામાં જ યોગ્ય પ્રોસેસ વગર નવું તેલ ભરાતું હતું
તપાસ દરમિયાન અધિકારીઓને સ્થળ પરથી 300 જેટલા અગાઉ ઉપયોગમાં લેવાયેલા જૂના અને ખાલી તેલના ડબ્બા મળી આવ્યા હતા. કંપની દ્વારા આ જૂના ડબ્બાઓને કોઈ પણ પ્રકારની યોગ્ય સફાઈ કે શુદ્ધિકરણની પ્રોસેસ કર્યા વિના જ તેમાં નવું ખાદ્ય તેલ ભરીને માર્કેટમાં વેચાણ માટે મોકલવામાં આવતું હતું.
