અમદાવાદ ગ્રામ્યમાં ACBની ટીમે ભ્રષ્ટાચાર સામે મોટી કાર્યવાહી કરતા બોપલ પોલીસ સ્ટેશનના PSI અને હેડ કોન્સ્ટેબલને 5 લાખ રૂપિયાની લાંચ લેતા ઝડપી પાડ્યા છે.એક ફરિયાદી પાસેથી 10 લાખની લાંચ માગનાર આ બંને પોલીસકર્મીઓ અંતે રકઝક બાદ 5 લાખ રૂપિયા સ્વીકારતા રંગેહાથ ઝડપાઈ ગયા હતા. સમગ્ર મામલે ACBએ વધુ કાર્યવાહી હાથ ધરી છે.
ખેડા ACBનો સંપર્ક કરતા ACBએ છટકું ગોઠવ્યું
બોપલ પોલીસ સ્ટેશનમાં ફરજ બજાવતા PSI પ્રિતલ ચૌધરી અને હેડ કોન્સ્ટેબલ દિલીપ ભોઈ વિરુદ્ધ ખેડા ACBમાં ફરિયાદ નોંધાઈ હતી.ફરિયાદી પાસે કોઈ કામના બદલામાં PSI પ્રિતલ ચૌધરીએ 10 લાખ રૂપિયાની લાંચની માગણી કરી હતી.લાંબી રકઝક બાદ લાંચની રકમ ઘટાડીને 5 લાખ રૂપિયામાં સોદો નક્કી કરવામાં આવ્યો હતો.ફરિયાદીએ લાંચ આપવા બાબતે ખેડા ACBનો સંપર્ક કરતા ACBએ છટકું ગોઠવ્યું હતું.
