અમદાવાદ શહેરને 'ડ્રગ્સ ફ્રી સિટી' બનાવવાના મિશન સાથે કામ કરી રહેલી અમદાવાદ ક્રાઈમ બ્રાન્ચને એક મોટી ગુપ્ત બાતમી મળી હતી. બાતમી એવી હતી કે વસ્ત્રાલ જેવા ધમધમતા વિસ્તારમાં આવેલા 'સૂર્યમ એલિગન્સ' નામના રહેણાંક એપાર્ટમેન્ટના એક ફ્લેટમાં બહારથી ડ્રગ્સ લાવીને તેનું લોકલ સપ્લાય નેટવર્ક ચલાવવામાં આવી રહ્યું છે. આ ચોક્કસ બાતમીના આધારે ક્રાઈમ બ્રાન્ચની હાઇટેક ટીમે સૂર્યમ એલિગન્સમાં સર્જિકલ સ્ટ્રાઈક જેવો દરોડો પાડ્યો હતો.
રંગેહાથ ઝડપાયા બે આરોપીઓ
પોલીસ જ્યારે ફ્લેટમાં પ્રવેશી ત્યારે ત્યાં હાજર બે શખ્સો ડ્રગ્સના જથ્થા સાથે મળી આવ્યા હતા. પોલીસે સ્થળ પરથી તેજસકુમાર ઉર્ફે મોન્ટુ ઠક્કર અને અજય ઉર્ફે અજ્જુ જયસ્વાલ નામના બે પેડલરોની ધરપકડ કરી લીધી છે. ફ્લેટની ઝીણવટભરી તલાશી લેતા તેમાંથી કુલ ૧૫૦.૦૯૦ ગ્રામ ક્વોલિટી મેફેડ્રોન એટલે કે MD ડ્રગ્સનો જથ્થો મળી આવ્યો હતો, જેની આંતરરાષ્ટ્રીય અને બજાર કિંમત આશરે રૂ. ૪.૫૦ લાખ થાય છે.
