અમદાવાદમાં ખાનગી બસ સંચાલકો દિવાળીના તહેવારમાં વધુ રૂપિયા કમાવવાની લાલચમાં મુસાફરોના જીવ સાથે ગંભીર ખેલ રમી રહ્યા હોવાનો બનાવ સામે આવ્યો છે. ખાસ કરીને ભીમજીપુરા વિસ્તારમાં ખાનગી બસ સંચાલકોની બેફામતા જોવા મળી છે. તહેવારોમાં વતન જવા માટે લોકોની ભારે ભીડ અને બસોની અછતનો ફાયદો ઉઠાવીને આ સંચાલકોએ મુસાફરોને બસની છત ઉપર બેસાડીને જોખમી મુસાફરી કરાવી હતી. મુસાફરો જીવના જોખમે બસની ઉપર બેસીને સફર કરતા નજરે પડ્યા હતા, જે ખાનગી ટ્રાવેલ્સ સંચાલકોની બેદરકારી અને બેજવાબદારીની ચરમસીમા દર્શાવે છે.
ટ્રાવેલ્સ સંચાલકોની લોભવૃત્તિ
ખાનગી ટ્રાવેલ્સ સંચાલકોની આ જોખમી મુસાફરી કરાવવા પાછળનું મુખ્ય કારણ માત્ર અને માત્ર વધુ રૂપિયા કમાવવાની લાલચ છે. દિવાળીના સમયે ટિકિટોના ભાવ આસમાને પહોંચી જાય છે, તેમ છતાં પણ વતન જવા માટે લોકો ગમે તે રીતે મુસાફરી કરવા તૈયાર હોય છે. સંચાલકો આ મજબૂરીનો ગેરલાભ ઉઠાવે છે અને બસની અંદર જગ્યા ન હોવા છતાં મુસાફરોને જીવલેણ રીતે બસની છત પર બેસાડીને તેમના જીવનને જોખમમાં મૂકે છે. આ પ્રકારની મુસાફરી દરમિયાન અકસ્માત થવાની કે અન્ય કોઈ દુર્ઘટના થવાની સંભાવના ઘણી વધારે હોય છે, જેના માટે સીધી રીતે ખાનગી બસ સંચાલકો જ જવાબદાર ગણાય.
