અમદાવાદ શહેરમાં ગેરકાયદેસર પ્રવૃત્તિઓ અને સાયબર ક્રાઈમને પ્રોત્સાહન આપતા પ્રી-એક્ટિવેટેડ સિમકાર્ડના કૌભાંડ સામે કાગડાપીઠ પોલીસે મોટી સફળતા મેળવી છે. પોલીસે ચોક્કસ બાતમીના આધારે દરોડો પાડીને ગેરકાયદેસર રીતે પ્રી-એક્ટિવેટેડ સિમકાર્ડ વેચતા 3 આરોપીઓની ધરપકડ કરી છે. આ આરોપીઓ ઉત્તરાખંડના હરિદ્વારથી અમદાવાદમાં પ્રી-એક્ટિવેટેડ સિમકાર્ડનો જથ્થો લાવીને અહીં તેનું ગેરકાયદે વેચાણ કરતા હોવાનું બહાર આવ્યું છે.
108 પ્રી-એક્ટિવેટેડ સિમકાર્ડ સહિત રૂ. 1.09 લાખનો મુદ્દામાલ જપ્ત
પોલીસે કાર્યવાહી દરમિયાન ઝડપાયેલા ત્રણેય આરોપીઓ પાસેથી કુલ 108 નંગ પ્રી-એક્ટિવેટેડ સિમકાર્ડ જપ્ત કર્યા છે. આ સિમકાર્ડ ઉપરાંત પોલીસે અન્ય સામગ્રી અને રોકડ રકમ મળીને કુલ રૂ. 1.09 લાખનો મુદ્દામાલ કબ્જે કર્યો છે. પકડાયેલા આરોપીઓમાંથી બે ઉત્તરાખંડના વતની હોવાનું સામે આવ્યું છે, જેઓ નેટવર્ક બનાવીને ગુજરાતમાં આ સિમકાર્ડ સપ્લાય કરી રહ્યા હતા.