અમદાવાદના સરખેજ વિસ્તારમાં કુખ્યાત ડ્રગ્સ ફેક્ટરી ઝડપાયાના મામલે નાર્કોટિક્સ કંટ્રોલ બ્યુરો (NCB)ની તપાસમાં એક પછી એક ચોંકાવનારા અને સનસનીખેજ ખુલાસા સામે આવ્યા છે. મુખ્ય આરોપી મુદસ્સર પઠાણ દ્વારા ચલાવવામાં આવતી આ ગેરકાયદે ફેક્ટરી પાછળના ચોક્કસ કારણો અને તેની ગુનાહિત પૃષ્ઠભૂમિ અંગે NCB દ્વારા ઊંડાણપૂર્વક તપાસ હાથ ધરવામાં આવી છે.
બિટકોઈનથી કમાણી અને નશાની ઘાતક લત
પ્રાપ્ત વિગતો અનુસાર, આરોપી મુદસ્સર પઠાણે વર્ષ 2007 અને 2008ના સમયગાળામાં એક કાફે શરૂ કર્યું હતું. આ કાફેમાં આવતા ગ્રાહકોના સંપર્કમાં આવ્યા બાદ તે MD ડ્રગ્સની ઘાતક લતે ચઢ્યો હતો. જોકે, તે અગાઉ બિટકોઈનના વ્યવસાયમાં સારા એવા નાણાં કમાયો હતો, પરંતુ નશાની લત અને મોંઘા શોખના કારણે તે ભારે દેવામાં ડૂબી ગયો હતો.
દેવામાંથી બહાર આવવા 2024માં શરૂ કરી ડ્રગ્સ ફેક્ટરી
નશાની લત અને વધતા જતા દેવાના કારણે આરોપી આર્થિક ભીંસમાં મુકાઈ ગયો હતો. દેવામાંથી ઝડપથી બહાર નીકળવા અને સરળતાથી રૂપિયા કમાવવાની લાલચમાં તેણે વર્ષ 2024થી પોતાના જ ઘરમાં કે અન્ય જગ્યાએ ડ્રગ્સ બનાવવાની ફેક્ટરી શરૂ કરી દીધી હતી. આરોપીનું મુખ્ય આયોજન ડ્રગ્સ વેચીને મોટો નફો રળવાનું અને પોતાનું તમામ દેવું ચૂકવવાનું હતું.

ગર્લફ્રેન્ડ પાછળ પાણીની જેમ વહેડાવ્યા રૂપિયા
તપાસમાં એવું પણ બહાર આવ્યું છે કે, આરોપીએ ડ્રગ્સના વેચાણ અને અન્ય માધ્યમોથી મેળવેલા નાણાં પોતાની ગર્લફ્રેન્ડ પાછળ બેફામ ખર્ચ્યા હતા. મોંઘા શોખ અને ગર્લફ્રેન્ડ પાછળ લાખો રૂપિયા ઉડાવવાને કારણે તેની મુશ્કેલીઓ વધુ વધી હતી અને તે અપરાધની દુનિયામાં વધુ ઊંડે સુધી ઉતરી ગયો હતો.
NCB દ્વારા 1 દિવસના રિમાન્ડ અને વ્યાપક તપાસ શરૂ
આ સમગ્ર નેટવર્કનો પર્દાફાશ કરવા માટે NCB એ આરોપી મુદસ્સર પઠાણના 1 દિવસના રિમાન્ડ મેળવીને કડક પૂછપરછ શરૂ કરી છે. આ ડ્રગ્સ રેકેટમાં સ્થાનિક સ્તરે કયા કયા પેડલરો અને અન્ય શખ્સો સંકળાયેલા છે તે અંગે તપાસનો ધમધમાટ શરૂ થયો છે. આ નેટવર્ક માત્ર ગુજરાત પૂરતું સીમિત ન રહેતા રાજસ્થાન અને મધ્યપ્રદેશ સુધી ફેલાયેલું હોવાની શંકાના આધારે આ ત્રણેય રાજ્યોમાં NCB દ્વારા વ્યાપક તપાસ હાથ ધરવામાં આવશે.
આ પણ વાંચો: Ahmedabad News: સોશિયલ મીડિયા પરથી પ્રેમ, મૈત્રી કરાર અને પછી આત્મહત્યા, પતિ સહિત ચાર જેલના સળિયા પાછળ!