અમદાવાદ શહેરના પોશ વિસ્તાર ગણાતા શીલજ સર્કલ નજીક હિટ એન્ડ રનની એક અત્યંત દિલઘ્રજાવતી અને ગંભીર ઘટના સામે આવી છે. શીલજ સર્કલ નજીક ગુરુકૃપા ટ્રેડર્સ ચાર રસ્તા પાસે પૂરઝડપે દોડતી લક્ઝરીયસ રેન્જ રોવર કાર (નંબર GJ 27 EK 0600) ના ચાલકે એક રેપિડો બાઈકને જોરદાર ટક્કર મારી હતી. આ અકસ્માતમાં રેપિડો ચાલક પ્રદીપ કુમાર અને તેની પાછળ બેઠેલા મુસાફર ગંભીર રીતે ઘાયલ થયા હતા. અકસ્માત એટલો ભયાનક હતો કે પાછળ બેઠેલા 35 વર્ષીય હર્ષદકુમાર પુરબિયાનું કરુણ મૃત્યુ નીપજ્યું હતું, જ્યારે મૃતક મૂળ સુરેન્દ્રનગર જિલ્લાના ધાંગધ્રાના વતની હતા અને હાલ અમદાવાદના શાસ્ત્રીનગર વિસ્તારમાં રહેતા હતા.
બોપલ પોલીસે CCTV ના આધારે કરી ધરપકડ
ઘટનાને અંજામ આપ્યા બાદ કારચાલક રાઘવેન્દ્ર કુશવાહ પોતાની રેન્જ રોવર કાર ઘટનાસ્થળે જ મૂકીને નાસી છૂટ્યો હતો. આ ગંભીર ગુનાની ગંભીરતાને ધ્યાનમાં રાખીને બોપલ પોલીસ સ્ટેશનની ટીમ તાત્કાલિક હરકતમાં આવી હતી. પોલીસે આસપાસના CCTV ફૂટેજ અને ગાડીની નંબર પ્લેટના ટેકનિકલ પુરાવાઓ આધારે સઘન તપાસ હાથ ધરી હતી અને ટૂંક સમયમાં જ ફરાર થઈ ગયેલા મુખ્ય આરોપી રાઘવેન્દ્ર કુશવાહને દબોચી લીધો હતો તેમજ તેની રેન્જ રોવર કાર પણ જપ્ત કરી લીધી હતી.
