અમદાવાદ શહેરના અતિ પોશ ગણાતા કાવેરી વિવંતા એપાર્ટમેન્ટમાં એક અત્યંત વિચિત્ર અને અનોખી ઘરફોડ ચોરીનો કિસ્સો સામે આવ્યો છે. અહીં રહેતા રહીશના ઘરમાંથી રાતોરાત ટ્રકમાં આખી ઘરવખરી ભરીને અજાણ્યા શખ્સો ગાયબ થઈ ગયા હતા. સૌથી ચોંકાવનારી વાત એ છે કે આ ચોરી સોસાયટીના સિક્યુરિટી ગાર્ડ્સની નજર સામે જ અંજામ આપવામાં આવી હતી. એટલું જ નહીં, ચોરી કર્યા બાદ ચોરોએ ઘરમાં કોઈ પ્રવેશી ન શકે તે માટે ઘરનો આખો દરવાજો જ બદલી નાખ્યો હતો.
અંગત વિવાદ, ધમકીની ઓડિયો ક્લિપ અને વીડિયો વાયરલ
આ સમગ્ર ચોરીનો આક્ષેપ અંગત વિવાદના કારણે થયો હોવાનું વિગતોમાં સામે આવી રહ્યું છે. ઘટના સંબંધિત કેટલાક ચોંકાવનારા પુરાવા પણ સામે આવ્યા છે, જેમાં ઘર તોડવાનો લાઈવ વીડિયો અને ધમકી આપતી એક ઓડિયો ક્લિપનો સમાવેશ થાય છે. આ ઓડિયો ક્લિપ અને વીડિયો વાયરલ થતાં સમગ્ર વિસ્તારમાં ભારે ચકચાર મચી ગઈ છે. પીડિત પરિવારનો આક્ષેપ છે કે આ ચોરી પાછળ અંગત અદાવત અને મોટું ષડયંત્ર કામ કરી રહ્યું છે.