અમદાવાદના વટવા રિંગ રોડ પર આવેલી રોપડા ચેક પોસ્ટ નજીક વટવા પોલીસે બાતમીના આધારે વોચ ગોઠવી એક શખ્સને શંકાસ્પદ હાલતમાં અટકાવ્યો હતો. પૂછપરછમાં તેનું નામ નાઝીમઅહમદ અબ્બાસ શાહ (ઉંમર 36 વર્ષ, રહે. ધુળે, મહારાષ્ટ્ર) હોવાનું સામે આવ્યું હતું. પોલીસે તેની પાસે રહેલી ટ્રાવેલિંગ સૂટકેસની તપાસ કરતા તેમાંથી 10 પાર્સલમાં પેક કરેલો ભૂખરો વનસ્પતિજન્ય પદાર્થ મળી આવ્યો હતો. FSL તપાસમાં આ જથ્થો ગાંજો હોવાનું પુરવાર થતાં પોલીસે 20 કિલો 220 ગ્રામ ગાંજો જેની કિંમત રૂ. 10,11,000 થાય છે તેને જપ્ત કર્યો હતો.
એક ટ્રીપના રૂ. 10 હજારની લાલચે બન્યો કેરિયર
પોલીસ પૂછપરછ દરમિયાન આરોપી નાઝીમે કબૂલાત કરી હતી કે, તેને આર્થિક તંગી હોવાથી રાજકોટના શુભમ પરમાર નામના શખ્સે ઓડિશાથી ગાંજો લાવવાનું કામ સોંપ્યું હતું. આ કામ બદલ તેને પ્રતિ ટ્રીપ રૂ. 10,000 આપવાનું નક્કી કરાયું હતું. 9 સપ્ટેમ્બરે ઓડિશાના ભુવનેશ્વર પહોંચી તેણે દીબાના મુની અને મુકેશ નામના શખ્સો પાસેથી ગાંજાથી ભરેલી આ સૂટકેસ મેળવી હતી અને રૂ. 25,000 ઓનલાઈન ચૂકવ્યા હતા.
