અમદાવાદ શહેરમાં ફરી એકવાર સુરક્ષા એજન્સીઓ અને વાલીઓની ચિંતા વધારતી ઘટના સામે આવી છે. અમદાવાદ શહેરની નામાંકિત શાળાઓને બોમ્બથી ઉડાવી દેવાની ધમકીભર્યા ઈ-મેઈલ મળ્યા છે. વેજલપુર વિસ્તારમાં આવેલી જાણીતી ઝાયડસ સ્કૂલ ઓફ એક્સેલન્સ સહિત કુલ 5 થી વધુ શાળાઓને આ પ્રકારે ધમકીભર્યા મેઈલ મળતા શિક્ષણ જગતમાં ભારે ખળભળાટ મચી ગયો છે.
તંત્ર એલર્ટ અને પોલીસ દ્વારા તપાસ શરૂ
મેઈલ મળતા જ શાળાઓ દ્વારા ત્વરિત ધોરણે સ્થાનિક પોલીસ અને ઉચ્ચ અધિકારીઓને આ અંગેની જાણ કરવામાં આવી હતી. ઘટનાની ગંભીરતાને ધ્યાનમાં રાખીને પોલીસ વિભાગ તાત્કાલિક હરકતમાં આવ્યો છે અને સંવેદનશીલ શાળાઓ તેમજ પરિસરમાં સઘન તપાસ હાથ ધરી છે. સાયબર ક્રાઈમ ટીમ દ્વારા પણ આ મેઈલ ક્યાંથી અને કોણે મોકલ્યો છે તેની ટેકનિકલ તપાસ શરૂ કરવામાં આવી છે.
