પવિત્ર યાત્રાધામ અંબાજીમાં નવરાત્રિના ઉત્સવ વચ્ચે કાયદો અને વ્યવસ્થાની સ્થિતિ કથળી હોવાનો એક ગંભીર કિસ્સો સામે આવ્યો છે. અહીં લારી ફેરવીને પાપડ વેચી પોતાનું અને પરિવારનું પૂરું કરતા આનંદ નામના એક મહેનતુ યુવકને અસામાજિક તત્વોએ નિશાન બનાવ્યો હતો. રાત્રિના સમયે અચાનક ધસી આવેલા 15 થી વધુ અસામાજિક શખસોના ટોળાએ યુવક પર તૂટી પડીને તેને બેરહમીથી ઢોર માર માર્યો હતો. હુમલાખોરો યુવકની દિવસભરની મહેનતની આકરી કમાણીના નાણાં લૂંટીને સ્થળ પરથી ફરાર થઈ ગયા હતા.
લૂંટ ચલાવી ભાગતા શખસો CCTVમાં કેદ
આ સમગ્ર મારામારી અને લૂંટની ગંભીર ઘટનાના CCTV (સીસીટીવી) ફૂટેજ પણ સામે આવ્યા છે. વાયરલ થયેલા આ વીડિયોમાં હુમલો કર્યા બાદ લૂંટ ચલાવીને ટોળામાં દોડતા અને ભાગી રહ્યા હોય તેવા શખસો સ્પષ્ટપણે નજરે પડી રહ્યા છે. ઘટના અંગે ભોગ બનનાર યુવકની માતા મોનિકાબેન સિંધીએ અત્યંત દુઃખ સાથે પોતાનો આક્રોશ ઠાલવ્યો હતો. તેમણે જણાવ્યું હતું કે તેમનો પુત્ર પ્રામાણિકતાથી રોજીરોટી કમાઈ રહ્યો હતો ત્યારે તેને આ રીતે મારીને તેની કમાણી લૂંટી લેનારા તમામ ગુનેગારો સામે પોલીસ તાત્કાલિક ધોરણે કડકમાં કડક કાર્યવાહી કરે અને તેમને ન્યાય અપાવે.