ઓગડ તાલુકાના વડા ગામમાંથી એક આધેડનો મૃતદેહ શંકાસ્પદ સ્થિતિમાં મળી આવતાં સમગ્ર વિસ્તારમાં ભારે ચકચાર મચી ગઈ છે. મૃતકની ઓળખ વડા ગામના રહીશ જાલુમીર નાનુમીર મીર તરીકે થઈ છે. અચાનક ગામમાંથી જ તેમનો મૃતદેહ બિનવારસી અથવા શંકાસ્પદ અવસ્થામાં મળી આવતાં જ સ્થળ પર લોકોનાં ટોળેટોળાં ઉમટી પડ્યા હતા અને આ ઘટનાને પગલે ગ્રામજનોમાં ભારે અરેરાટી અને ભયનો માહોલ વ્યાપી ગયો છે.
કુદરતી મોત કે હત્યા? રહસ્ય ઘેરાતાં ચર્ચાઓએ જોર પકડ્યું
જાલુમીર મીરનો મૃતદેહ જે સ્થિતિમાં મળી આવ્યો છે તેને જોતાં આ સામાન્ય કે કુદરતી મોત નથી પરંતુ તેમની નિર્મમ હત્યા કરવામાં આવી હોવાની ચર્ચાઓએ પંથકમાં જોર પકડ્યું છે. આધેડના શરીર અને આસપાસના સંજોગોને આધારે સ્થાનિકો દ્વારા હત્યાની પ્રબળ આશંકા વ્યક્ત કરવામાં આવી રહી છે, જેને પગલે ઘટના અંગેનું રહસ્ય વધુ ઘેરાયું છે.