ગુજરાતમાં ગેરકાયદે ખનીજ ચોરી અને ખનન માફિયાઓ સામે પ્રશાસન દ્વારા કડક પગલાં લેવામાં આવી રહ્યા છે, ત્યારે ભાવનગરથી એક અત્યંત ચોંકાવનારો કિસ્સો સામે આવ્યો છે. ખનીજ ચોરો પોલીસ અને વહીવટી તંત્રની રેડથી બચી શકે તે માટે અગાઉથી જ સરકારી અધિકારીઓની હિલચાલ પર નજર રાખનાર એક સક્રિય સિન્ડિકેટનો પર્દાફાશ થયો છે. ભાવનગર લોકલ ક્રાઈમ બ્રાન્ચ (LCB) ની ટીમે બાતમીના આધારે સઘન ઓપરેશન હાથ ધરીને અધિકારીઓની વોચ રાખતા 2 શખ્સોને રંગે હાથ ઝડપી લીધા છે, જેનાથી ખનન માફિયાઓમાં ભારે ફફડાટ ફેલાઈ ગયો છે.
અધિકારીઓની મુવમેન્ટની આપતા હતા માહિતી
આ સમગ્ર કૌભાંડની વિગતો આપતા તપાસમાં બહાર આવ્યું છે કે પકડાયેલા આરોપીઓ કલેક્ટર કચેરીની બહાર બેસીને સરકારી અધિકારીઓની ગાડીઓ અને તેમની મુવમેન્ટ પર સતત વોચ રાખતા હતા. આ માહિતી પહોંચાડવા માટે તેમણે 'જય રામાધણી' નામનું એક ગુપ્ત WhatsApp ગ્રુપ બનાવ્યું હતું, જેમાં ખનીજ ચોરો અને ભુમાફિયાઓ જોડાયેલા હતા. આ ગ્રુપમાં કયો અધિકારી ક્યારે કયા રસ્તે તપાસ માટે નીકળે છે તેની પળપળની વિગતો શેર કરવામાં આવતી હતી. આ સેવા બદલ ગ્રુપના સભ્યો પાસેથી દર મહિને રૂ. 1,000 જેટલી રકમ પણ વસૂલવામાં આવતી હોવાનું તપાસમાં ખુલ્યું છે.