ભાવનગર જિલ્લાના ઘોઘા તાલુકાના ખરકડી ગામની સીમમાં યોજાયેલી એક દારૂની મહેફિલ માતમમાં ફેરવાઈ ગઈ છે. ઝેરી અને નકલી દારૂ પીવાના કારણે અત્યાર સુધીમાં 7 લોકોના કરૂણ મોત નિપજ્યા છે, જ્યારે 18 જેટલા લોકો હજુ પણ હોસ્પિટલમાં સારવાર હેઠળ છે.
સૌથી ચોંકાવનારી વાત એ છે કે પોલીસ ભરતીમાં સિલેક્ટ થયેલા વિશ્વરાજસિંહ ગોહિલ નામના યુવકે પોતાના મિત્રોને ખુશી મનાવવા પાર્ટી આપી હતી, જેમાં મિથેનોલ યુક્ત ઝેરી દારૂ પીવાથી આ મોટી દુર્ઘટના ઘટી છે. ખુશી માટે યોજાયેલી પાર્ટી માતમમાં ફેરવાઇ ગઇ છે.
ઘટના સામે આવતા જ જિલ્લા પોલીસવડા નિતેશ પાંડેય દ્વારા કડક પગલાં લેવામાં આવ્યા છે. ફરજમાં બેદરકારી દાખવવા બદલ વરતેજ પોલીસ મથકના બીટ જમાદાર અને 3 ડી-સ્ટાફના કર્મચારીઓ સહિત કુલ 4 પોલીસકર્મીઓને તાત્કાલિક અસરથી સસ્પેન્ડ કરી દેવાયા છે. આ ઉપરાંત પોલીસે 21 જેટલા બુટલેગરો સામે નામજોગ ફરિયાદ નોંધીને 13 આરોપીઓની અટકાયત કરી લીધી છે.
https://twitter.com/sandeshnews/status/2090131005432795244
પોલીસ તપાસમાં અત્યંત ચોંકાવનારા ખુલાસા થયા છે. મુખ્ય આરોપી ગૌતમ સોલંકીના ઘરે મધ્યપ્રદેશના ઉજ્જૈનથી આવેલા રઈસ, નરેન્દ્રસિંહ યાદવ (ઉર્ફે ડોક્ટર) અને જુબેર નામના શખ્સોએ ભેગા મળીને આ બોગસ દારૂ બનાવ્યો હતો. આ માટેનું રો-મટીરીયલ, મિથેનોલ, ખાલી બોટલો અને ઢાંકણા અમદાવાદના સરખેજ વિસ્તારમાંથી ટ્રાન્સપોર્ટ મારફતે મંગાવવામાં આવ્યા હતા.
નકલી દારૂ બનાવનાર નરેન્દ્રસિંહે પોતે પણ 17 ઓગસ્ટના રોજ આ દારૂનું સેવન કર્યું હતું, જેના કારણે 18 ઓગસ્ટે તેનું પણ મોત નીપજ્યું હતું. આરોપી ગૌતમે આ પહેલાં પણ 51 પેટી ડુપ્લીકેટ દારૂ બનાવીને વેચ્યો હોવાનું સામે આવ્યું છે..
આ પણ વાંચો : Patan : લોકગાયિકા કિંજલ રબારીએ પ્રભુતામાં પગલાં માંડ્યા, ભુતકાળ ભુલી આ યુવક સાથે કર્યા લગ્ન