ગાંધીનગર જિલ્લામાં ગેરકાયદે ખનીજ ચોરી કરતા માફિયાઓ હવે બેફામ બન્યા હોય તેવું લાગી રહ્યું છે. કાયદેસરની કાર્યવાહી કરવા ગયેલી ખાણ ખનીજ વિભાગની ટીમ પર હુમલો કરવાની ગંભીર ઘટના સામે આવી છે. આ બનાવ કલોલ આંબેડર બ્રિજ નજીક બન્યો હતો. ટીમ દ્વારા છત્રાલ પાસે ચાલી રહેલી ગેરકાયદે ખનીજ ચોરીની કાર્યવાહી દરમિયાન એક ડમ્પર પકડવામાં આવ્યું હતું. જ્યારે અધિકારીઓ આ જપ્ત કરેલા ડમ્પરને કલેક્ટર કચેરી તરફ લઈ જઈ રહ્યા હતા, તે દરમિયાન અચાનક 3 (ત્રણ) જેટલા અજાણ્યા વ્યક્તિઓ બાઇક પર ધસી આવ્યા હતા અને તેમણે અધિકારીઓની ટીમ પર હુમલો કર્યો હતો.
અધિકારીઓ પાસેથી ડમ્પર છોડાવી ફરાર
હુમલો કરનારા આ ત્રણેય વ્યક્તિઓનો ઈરાદો સ્પષ્ટ હતો: ગેરકાયદે ખનીજ ચોરીમાં પકડાયેલા ડમ્પરને બળજબરીથી છોડાવી જવું. હુમલાખોરોએ સરકારી કર્મચારીઓને આંતરીને તેમની સાથે ઝપાઝપી કરી હતી અને અધિકારીઓને ડરાવી-ધમકાવીને તેમની પાસેથી ડમ્પરનો કબજો છોડાવી દીધો હતો. દિવસના અજવાળામાં અને સરકારી ટીમ પર થયેલો આ સરેઆમ હુમલો કાયદાના શાસન સામે ખુલ્લો પડકાર સમાન છે. આ ઘટના દર્શાવે છે કે ગેરકાયદે ખનીજ ચોરીનું રેકેટ ચલાવનારા તત્ત્વો કેટલા હિંમતવાન અને નિર્ભય બની ગયા છે. આ હુમલામાં અધિકારીઓને સામાન્ય ઈજાઓ થઈ હોવાનું પણ જાણવા મળ્યું છે.
