ગાંધીનગર જિલ્લાના દહેગામ તાલુકાના વાસણા રાઠોડ ગામમાં પશુપાલકોના પશુઓની ચોરી કરતી કોઈ કુખ્યાત ગેંગ સક્રિય થઈ હોવાનું સામે આવ્યું છે. શિયાળાની ઠંડીની શરૂઆતની સાથે જ ગામમાં પશુ ચોરીની ઘટનાઓ વધતા પશુપાલકો અને ખેડૂતોમાં ભારે ફફડાટ અને રોષ જોવા મળી રહ્યો છે. તસ્કરો બેફામ બનીને રાત્રિના સમયે વાહનો લઈને ગામમાં આવે છે, અને પશુઓને નિશાન બનાવીને ફરાર થઈ જાય છે.
એક જ પશુપાલકને ત્યાં વારંવાર તસ્કરોનો હાથફેરો
મળતી માહિતી મુજબ, ગામના પશુપાલક રોહિતસિંહ રાઠોડના ઘરે ગત ઓગસ્ટ માસમાં 3 ભેંસોની ચોરી થઈ હતી. હજુ તે બનાવની કળ વળી નથી ત્યાં જ ગત રાત્રે ફરીથી તે જ પશુપાલકના ઘરેથી વધુ બે ભેંસો તસ્કરો ઉઠાવી ગયા હતા. માત્ર 3 મહિનાના ટૂંકા ગાળામાં એક જ પરિવારની કુલ 5 ભેંસો ચોરાઈ જવાથી પશુપાલક અત્યંત દયનીય અને આર્થિક મુશ્કેલીમાં મુકાયા છે. આ ઉપરાંત, ગત રાત્રે ગામના અન્ય એક પશુપાલકનું પશુ પણ ચોરાતા કુલ 3 પશુઓ રાત્રે જ ગાયબ થયા હતા.

