ગાંધીનગર (Gandhinagar) જિલ્લાના દહેગામ (Dehgam) તાલુકાના અંગુથલા (Anguthala) ગામમાંથી માનવતાને શરમાવી દે તેવી એક હ્રદયદ્રાવક ઘટના સામે આવી છે. ગામના ગૌચર વિસ્તારના કોતરમાંથી કોઈ અજાણી માતા દ્વારા જન્મતાની સાથે જ ત્યજી દેવાયેલી એક માસૂમ નવજાત બાળકી બિનવારસી હાલતમાં મળી આવી છે. આ અમાનવીય કૃત્યના કારણે સમગ્ર પંથકમાં ભારે રોષ અને હૈયાવરાળ ફેલાઈ ગઈ છે.
ગ્રામજનની સતર્કતાથી બાળકીનો બચાવ
પ્રાપ્ત વિગતો અનુસાર, વહેલી સવારે એક ગ્રામજનની નજર ગૌચરના કોતરમાં પડેલી આ નવજાત બાળકી પર પડી હતી. તેમણે તાત્કાલિક આ બાબતની જાણ ગામના સરપંચ (Sarpanch) ને કરી હતી. મામલાની ગંભીરતાને જોતા ત્વરિત 108 (108 Emergency Service) એમ્બ્યુલન્સને બોલાવવામાં આવી હતી. 108 ની ટીમ દ્વારા બાળકીને પ્રાથમિક સારવાર આપીને વધુ સઘન સારવાર અર્થે ગાંધીનગર (Gandhinagar Hospital) ની હોસ્પિટલમાં ખસેડવામાં આવી છે, જ્યાં તબીબોની દેખરેખ હેઠળ તેની સારવાર ચાલી રહી છે.