ગાંધીનગરના સેક્ટર 7 પોલીસ સ્ટેશન હદ વિસ્તારમાં આવેલા 4A વિસ્તારમાં ગતરોજ એક મહિલાની હત્યાની ચોંકાવનારી ઘટના સામે આવી હતી. સંગીતાબેન નામની મહિલાની હત્યા પાછળ અન્ય કોઈ નહીં પરંતુ તેનો જ પતિ અને તેની પ્રેમિકા હોવાનું પોલીસ તપાસમાં બહાર આવ્યું છે. આ સનસનીખેજ ખુલાસાથી સમગ્ર વિસ્તારમાં ભારે ચકચાર મચી ગઈ છે.
લાઈબ્રેરીમાં શરૂ થયેલો પ્રેમ સંબંધ ખૂની અદાવતમાં ફેરફાર્યો
પોલીસ તપાસમાં સામે આવ્યું છે કે, મુખ્ય આરોપી રોહિત રમેશ ઠાકોર સેક્ટર 2 ની લાયબ્રેરીમાં જતો હતો, જ્યાં તેનો સંપર્ક વર્ષા નામની યુવતી સાથે થયો હતો. સમય જતાં બંને વચ્ચે ગાઢ પ્રેમ સંબંધ બંધાયો હતો અને તેઓએ સાથે રહેવાનું નક્કી કર્યું હતું. દરમિયાન રોહિતની પત્ની સેક્ટર 4A માં રહેવા આવી, ત્યારે તેને આ પ્રેમ સંબંધ વિશે જાણ થઈ ગઈ હતી, જેને લઈને ઘરમાં અવારનવાર ઝઘડા થતા હતા.
હાથરૂમાલથી ગળેટૂંપો આપીને કરપીણ હત્યા
પ્રેમ સંબંધમાં અડચણરૂપ બનતી બાબતો અને ઘરેરોજ થતા ઝઘડાથી કંટાળીને રોહિત અને વર્ષાએ સંગીતાબેનને રસ્તામાંથી હટાવવાનું નક્કી કર્યું હતું. કાવતરાના ભાગરૂપે બંનેએ સાથે મળીને હાથરૂમાલ વડે સંગીતાબેનનો ગળેટૂંપો આપીને નિર્દયતાપૂર્વક હત્યા કરી નાખી હતી. આ ઘટનાને અંજામ આપ્યા બાદ આરોપીઓ નાસી છૂટવાના ફિરાકમાં હતા.
પોલીસે બંને આરોપીઓની કરી ધરપકડ
ઘટનાની ગંભીરતાને ધ્યાનમાં લઈને સેક્ટર 7 પોલીસે ત્વરિત કાર્યવાહી હાથ ધરી હતી અને ટેક્નિકલ તેમજ હ્યુમન ઇન્ટેલિજન્સના આધારે ગણતરીના કલાકોમાં જ બંને આરોપીઓ રોહિત રમેશ ઠાકોર અને તેની પ્રેમિકા વર્ષાને ઝડપી લીધા હતા. હાલ પોલીસે બંનેની કડક અટકાયત કરીને આ હત્યા કેસમાં વધુ પૂછપરછ અને કાયદેસરની તપાસ શરૂ કરી છે.
આ પણ વાંચો: Gandhinagar News: મહેસૂલી કર્મચારીઓ માટે મોટા સમાચાર, જાણો શું આવ્યો નિવેડો?
