મોરબી જિલ્લાના હળવદ તાલુકામાં નદી પટમાંથી થઈ રહેલી ગેરકાયદે ખનિજ ચોરી સામે ખાણ-ખનિજ વિભાગે લાલ આંખ કરી છે. તાલુકાના ચાડધરા ગામ નજીક આવેલી નદીમાંથી મોડી રાત્રિના અંધારાનો લાભ ઉઠાવીને મોટા પાયે ચોરી-છૂપીથી રેતીનું ખનન કરવામાં આવી રહ્યું હોવાની ચોક્કસ બાતમી મળી હતી. આ બાતમીના આધારે ખનિજ વિભાગની ટીમે અચાનક દરોડો પાડીને ગેરકાયદે રેતીચોરીમાં સંકળાયેલા 7 જેટલા ટ્રેક્ટરોને રંગેહાથ ઝડપી પાડ્યા હતા.
જપ્ત કરાયેલા વાહનો હળવદ પોલીસ મથકે સોંપાયા
મોડી રાત્રે પાડવામાં આવેલા આ સફળ દરોડા દરમિયાન ખનિજ વિભાગની ટીમે તમામ 7 ટ્રેક્ટરોને કબ્જે લીધા હતા અને આગળની કાયદાકીય કસ્ટડી માટે હળવદ પોલીસ સ્ટેશનને સોંપી દીધા હતા. પોલીસે તમામ વાહનો જપ્ત કરી સીઝ કરવાની કાર્યવાહી હાથ ધરી છે. આ કાર્યવાહીના કારણે રેતીચોરીનો કાળો કારોબાર ચલાવતા સ્થાનિક માફિયાઓ અને ભૂમાફિયાઓમાં ભારે દહેશત અને ફફડાટ વ્યાપી ગયો છે.