ગુજરાતના આર્થિક પાટનગર ગણાતા સુરત શહેરમાં શ્રમિકોના હક્કો માટે થનારા મોટા મહાઆંદોલન પહેલાં જ પોલીસ તંત્ર અત્યંત એક્શન મોડમાં આવી ગયું છે. સાપ્તાહિક રજા અને યોગ્ય પગાર વધારા જેવી વ્યાજબી માગણીઓને લઈને શ્રમિકો દ્વારા મોટા આંદોલનની વિધિવત જાહેરાત કરવામાં આવી હતી. જોકે, આ આંદોલન શરૂ થાય તે પહેલાં જ પોલીસે ત્વરિત કાર્યવાહી કરીને શ્રમિક સંગઠનના 6 થી વધુ અગ્રણી નેતાઓની અટકાયત કરી લીધી છે.
સુરેશ સોનવણે અને મલખાનસિંહની ધરપકડ
પોલીસ દ્વારા કરવામાં આવેલી આ કામગીરીમાં શ્રમિક આંદોલનનો ચહેરો ગણાતા અગ્રણી નેતા સુરેશ સોનવણે તેમજ મલખાનસિંહ સહિતના મુખ્ય આગેવાનોની સ્થળ પરથી જ અટકાયત કરી લેવામાં આવી છે. આ નેતાઓની ધરપકડના સમાચાર વાયુવેગે પ્રસરતાં શ્રમિકો અને કામદાર વર્ગમાં ભારે રોષ ફેલાયો છે. શ્રમિક નેતાઓની અટકાયત કરીને આંદોલનને આગળ વધતું અટકાવવા માટે પોલીસ તંત્ર દ્વારા આ વ્યૂહાત્મક પગલું ભરવામાં આવ્યું હોવાનું માનવામાં આવી રહ્યું છે.