જામનગર જિલ્લામાં છેલ્લા કેટલાક સમયથી ગેરકાયદે હથિયારોનો ઉપયોગ અને તેની હેરાફેરીનું દૂષણ સતત વધી રહ્યું હોય તેવા એંધાણ મળી રહ્યા છે. માત્ર 4 દિવસના ટૂંકા ગાળામાં ફરી એક વખત શહેરમાંથી એક યુવક ગેરકાયદેસર હથિયાર સાથે પકડાતા સ્થાનિક રહીશો અને પોલીસ તંત્રમાં ચિંતાનો માહોલ સર્જાયો છે. આ ઘટનાએ શહેરમાં કાયદો અને વ્યવસ્થાની સ્થિતિ તેમજ ગેરકાયદે હથિયારોના નેટવર્ક પર ફરી એકવાર સવાલો ઊભા કર્યા છે.
ફલ્લા ગામના 24 વર્ષીય યુવક પાસેથી પિસ્ટલ જપ્ત
પોલીસે બાતમીના આધારે દરોડો પાડીને જામનગર તાલુકાના ફલ્લા ગામના રહીશ 24 વર્ષીય રાજેશ પ્રવીણભાઈ ધમસાણીયા નામના યુવકની દેશી બનાવટની પિસ્ટલ સાથે અટકાયત કરી છે. પોલીસે આરોપી પાસેથી એક ગેરકાયદે પિસ્ટલ અને કાર્ટીસ મળીને કુલ રૂ. 25,100નો મુદ્દામાલ કબજે કર્યો છે. આટલી નાની ઉંમરનો યુવક ક્યાંથી અને કયા હેતુ માટે આ હથિયાર લાવ્યો હતો તે અંગે વિસ્તારથી પૂછપરછ શરૂ કરાઈ છે.