જામનગર જિલ્લામાં ગત ૨૯ ઓક્ટોબર ૨૦૨૬ના રોજ મોડી રાત્રે પોલીસના હાથે ઝડપાયેલા અડધા કરોડ રૂપિયાના મસમોટા દારૂકાંડ મામલે દિવસે-દિવસે નવા ખુલાસા થઈ રહ્યા છે. આ ચકચારી બનાવ બન્યાને આજે 8 દિવસ જેટલો લાંબો સમય વીતી ગયો છે, તેમ છતાં મુખ્ય આરોપીઓ હજુ પણ પોલીસ પકડથી દૂર છે. રાજ્યમાં કડક પ્રોહિબિશનના દાવાઓ વચ્ચે આટલી મોટી માત્રામાં વિદેશી દારૂ પકડાયા બાદ પણ પોલીસ આરોપીઓને ઝડપી પાડવામાં ઊણી ઉતરતી દેખાઈ રહી છે, જેના કારણે સામાન્ય જનતા અને વિરોધ પક્ષો દ્વારા પોલીસની કામગીરી સામે ગંભીર સવાલો ઉઠાવવામાં આવી રહ્યા છે.
ભાજપના મહિલા નગરસેવિકા અને પુત્ર સંપર્કવિહોણા
આ સમગ્ર તપાસ દરમિયાન પોલીસને અત્યાર સુધીમાં માત્ર બે જ આરોપીઓ હાથ લાગ્યા છે, જેમાં કુખ્યાત બુટલેગર યોગેશ કોળીની ધરપકડ કરવામાં આવી છે. પોલીસની ઘનિષ્ઠ પૂછપરછ બાદ તેને જેલ હવાલે કરવામાં આવ્યો છે. આ ગુનામાં કુલ ૧૦ જેટલા બુટલેગરો ફરાર થયા હતા, જેમાં ભાજપના મહિલા નગરસેવિકાનો પુત્ર પણ સામેલ છે જે હજુ સુધી પોલીસ પકડથી દૂર છે. ખાસ વાત એ છે કે આ મામલે છેલ્લા 8 દિવસથી સંકળાયેલા મહિલા નગરસેવિકા ખુદ પણ સંપર્કવિહોણા થઈ ગયા છે અને પોતાના ઘરે તાળા મારીને ગાયબ થઈ ગયા છે, જેને કારણે રાજકીય બેડામાં ભારે ચકચાર મચી ગઈ છે.