જામનગર શહેરના સત્યમ કોલોની અન્ડર બ્રિજ નજીક આવેલી સુંદરમ સોસાયટીના પુષ્કર એપાર્ટમેન્ટમાં એક જટિલ અને ગંભીર ઘટના સામે આવી છે. એપાર્ટમેન્ટમાં રહેતા એક ફ્લેટ ધારકના પરિવાર સાથે પાડોશી બંધુઓએ નજીવી બાબતે ઉગ્ર માથાકૂટ કરીને હિંસક સ્વરૂપ ધારણ કર્યું હતું, જેનાથી સમગ્ર સોસાયટીમાં ભયનો માહોલ સર્જાયો હતો.
વૃદ્ધ પિતા, મહિલાઓ અને પૌત્ર સહિત પરિવારના 6 સભ્યો લોહિલુહાણ
આ હિંસક હુમલામાં પરિવારના મોભી એવા વૃદ્ધ પિતા, તેમના પુત્રો, પૌત્ર તેમજ ઘરની 2 મહિલા સભ્યો સહિત કુલ 6 લોકોને ગંભીર ઈજાઓ પહોંચી છે. પાડોશીઓએ અચાનક હુમલો કરી દેતાં પરિવારજનોને સંભાળવાનો મોકો મળ્યો ન હતો. તમામ ઈજાગ્રસ્તોને તાત્કાલિક સારવાર અર્થે જામનગર શહેરની જીજી હોસ્પિટલ ખસેડવામાં આવ્યા છે.
વિશાલ અને સુનિલ મહેતા સામે સતત ત્રાસ આપ્યાનો પરિવારે લગાવ્યો આક્ષેપ
ઈજાગ્રસ્ત પરિવારના જણાવ્યા અનુસાર, એપાર્ટમેન્ટમાં જ રહેતા વિશાલ અનિલ મહેતા અને સુનિલ અનિલ મહેતા નામના બે શખ્સો દ્વારા તેઓને અવારનવાર માનસિક અને શારીરિક ત્રાસ આપવામાં આવતો હતો. આ બે શખ્સો કારણ વગર પરિવારના સભ્યોને પરેશાન કરતા હોવાનો અને અગાઉ પણ અનેક વખત માથાકૂટ કરી ચૂક્યા હોવાનો ગંભીર આક્ષેપ પીડિત પરિવારે લગાવ્યો છે.
ઘટના સ્થળે પહોંચી પોલીસે તપાસનો ધમધમાટ શરૂ કર્યો
ઘટનાની જાણ થતાં જ સ્થાનિક પોલીસની ટીમ તુરંત ઘટના સ્થળે દોડી આવી હતી. પોલીસે સ્થળ પર પહોંચી પરિસ્થિતિ કાબૂમાં લીધી હતી અને ઈજાગ્રસ્તોના નિવેદન નોંધવાની તજવીજ હાથ ધરી હતી. હુમલો કરનાર બંને શખ્સો સામે કાયદેસરની કાર્યવાહી કરવા માટે પોલીસે ગુનો નોંધી આગળની તપાસ શરૂ કરી છે.
આ પણ વાંચો - Jamnagar: લાલપુર તાલુકામાં લક્ઝરી બસ અને કાર વચ્ચે ભયાનક અકસ્માત, કાર સવારનું મોત
