જૂનાગઢના ધરાનગર વિસ્તારમાં રહેતા એક પરિવારમાં નજીવી બાબતમાં સર્જાયેલા કંકાસે ભયાનક સ્વરૂપ ધારણ કરી લેતા એક હસતો-રમતો પરિવાર વેરવિખેર થઈ ગયો છે. સમાજમાં માનસિક વિકૃતિ અને ગુસ્સા પર કાબૂ ન રહેવાના કારણે કઈ હદ સુધીના ગંભીર પરિણામો આવી શકે છે, તેનો જીવતો-જાગતો કિસ્સો ધરાનગરમાં બન્યો છે. અહીં રહેતા ભોલા સોલંકી નામના શખ્સે પોતાની પત્ની જ્યોતિ સોલંકી સાથે માત્ર સોપારી ખાવાની બાબતમાં રકઝક અને ગાળાગાળી કરી હતી. આ મામૂલી વિવાદ એટલો વધ્યો કે ભોલાએ ભાન ગુમાવ્યું હતું.
લાકડી-ઢોર મારથી પત્ની લોહીલુહાણ
આરોપી પતિ ભોલા સોલંકીએ ઉશ્કેરાઈને ઘરમાં પડેલી વજનદાર વસ્તુઓ અથવા લાકડી વડે પોતાની પત્ની જ્યોતિબેન પર હિંસક હુમલો કરી દીધો હતો. તેણે જ્યોતિબેનને માથા તેમજ શરીરના નાજુક ભાગો પર બેરહેમીપૂર્વક ઢોર માર માર્યો હતો. પતિના આ ક્રૂર આક્રમણને કારણે જ્યોતિબેન ગંભીર રીતે ઘાયલ થઈને ઘરના લોહીલુહાણ હાલતમાં ઢળી પડ્યા હતા. ઘટનાને પગલે આસપાસના લોકો અને પરિવારજનો દ્વારા તેમને તાત્કાલિક લોહીલુહાણ હાલતમાં સારવાર અર્થે જૂનાગઢની સિવિલ હોસ્પિટલમાં ખસેડવામાં આવ્યા હતા. જો કે, વિધાતાને કંઈક જુદું જ મંજૂર હતું, હોસ્પિટલના બિછાને જિંદગી અને મોત વચ્ચેની જંગ લડતા-લડતા આખરે જ્યોતિબેન સોલંકીનું કરુણ મોત નીપજ્યું હતું.
