જુનાગઢના ચકચારી ગુજસીટોક (GUJCTOC) કેસના આરોપી અને હાલમાં જામીન પર મુક્ત થયેલા રાજુ સોલંકીની મુશ્કેલીઓમાં વધારો થયો છે. રાજુ સોલંકી અને અન્ય એક વ્યક્તિ પિયુષ બોરીચા સામે એક મહિલાએ ચારિત્ર્ય હનન અને બદનક્ષીની ગંભીર ફરિયાદ નોંધાવી છે. આ ફરિયાદ ભેંસાણ પોલીસ મથકમાં નોંધાઈ છે. આ સમગ્ર મામલો ત્યારે સામે આવ્યો જ્યારે રાજુ સોલંકીએ ભેંસાણ ખાતે આયોજિત એક જાહેરસભામાં બેફામ વાણી-વિલાસ કર્યો હતો. આ સભામાં તેણે ધોરાજીના ઝાંઝમેરની એક મહિલા અને તેના પતિના મિત્રના ચારિત્ર્ય પર સીધા આક્ષેપો કરીને જાહેરમાં તેમનું અપમાન કર્યું હતું.
મહિલાની ફરિયાદ અને કાયદાકીય કાર્યવાહી
રાજુ સોલંકી દ્વારા જાહેરસભામાં કરવામાં આવેલા અંગત અને બદનક્ષીભર્યા આક્ષેપોથી ત્રાસીને, ધોરાજીના ઝાંઝમેરની પીડિત મહિલાએ કાયદાનો સહારો લેવાનું નક્કી કર્યું. મહિલાએ તાત્કાલિક ભેંસાણ પોલીસ મથકમાં હાજર થઈને રાજુ સોલંકી અને પિયુષ બોરીચા સામે સત્તાવાર ફરિયાદ નોંધાવી છે. મહિલાએ પોતાની ફરિયાદમાં સ્પષ્ટપણે જણાવ્યું છે કે રાજુ સોલંકીએ રાજકીય લાભ મેળવવા કે અંગત અદાવતમાં પોતાનું અને પોતાના પતિના મિત્રનું ચારિત્ર્ય હનન કર્યું છે. પોલીસે આ ફરિયાદના આધારે રાજુ સોલંકી અને પિયુષ બોરીચા સામે ભારતીય દંડ સંહિતાની (IPC)ની સંબંધિત કલમો હેઠળ ગુનો દાખલ કર્યો છે અને આ મામલે વધુ તપાસ હાથ ધરી છે.
