મહેસાણા જિલ્લામાં ચોર ટોળકી સક્રિય થઈ ગઈ છે. ઘરફોડ અને લૂંટના બનાવો સામે આવી રહ્યાં છે. ત્યારે જિલ્લાના કડીના ધનાલી ગામમાં એક મંદિરમાં ચોરીની ઘટના સામે આવી છે. મહાદેવના મંદિરમાં મોડી રાત્રે તસ્કરોએ હાથ ફેરો કર્યો હતો. ચોરી કરતાં બે તસ્કરો સીસીટીવી કેમેરામાં કેદ થઈ ગયા હતાં. નંદાસણ પોલીસે ગુનો નોંધી તપાસ હાથ ધરી છે.
મહેસાણાના કડીમાં ધનાલી ગામે મંદિરમાં ચોરી
મહેસાણાના કડીમાં ધનાલી ગામમાં મહાદેવના મંદિરમાં તસ્કરો ત્રાટક્યા હતાં. હનુમાનજીના મંદિરના કમ્પાઉન્ડમાં સ્થિત મહાદેવના મંદિરમાં ચોરી કરી હતી. મંદિરની જાળીનું તાળુ તોડીને તસ્કરો અંદર પ્રવેશ્યા હતાં. તસ્કરોએ મંદિરમાંથી સાઉન્ડ સિસ્ટમ, ડીવીઆર, પાણીની મોટરો અને પંખા મળીને કૂલ 60 હજાર રૂપિયાની ચોરી કરી હતી. રાત્રે 2.15થી 3.45 વાગ્યા દરમિયાન બે શખ્સો ચોરી કરતાં સીસીટીવીમાં કેદ થયા હતાં. મંદિરના પૂજારી ભગતગીરી ગોસ્વામીએ નંદાસણ પોલીસ મથકે ફરિયાદ નોંધાવતા પોલીસે તપાસનો ધમધમાટ શરૂ કર્યો છે.