મહેસાણા શહેરમાં ટ્રાફિક નિયમન અને રોડ સેફ્ટીના ધજાગરા ઉડાવતો એક ચોંકાવનારો વિડીયો સોશિયલ મીડિયા પર વાયરલ થયો છે. શહેરના અંડરપાસમાંથી એક કારચાલક નબીરો ખુલ્લેઆમ 180 કિલોમીટર પ્રતિ કલાકની જીવલેણ સ્પીડે કાર હંકારી રહ્યો હોવાનું નજરે પડે છે. જાહેર માર્ગો પર આ પ્રકારે બેફામ સ્પીડે ગાડી ચલાવીને અન્ય વાહનચાલકો અને રાહદારીઓના જીવ જોખમમાં મૂકનારા આ કારચાલકના કૃત્યથી સમગ્ર મહેસાણા શહેરમાં ભારે ચકચાર મચી જવા પામી છે.

સોશિયલ મીડિયા પર લાઈક્સ માટે રીલ બનાવી વિડીયો વાયરલ કર્યો

વાયરલ થયેલી રીલમાં સ્પષ્ટ જોઈ શકાય છે કે આ યુવકે માત્ર સોશિયલ મીડિયા પર વ્યૂઝ અને લાઈક્સ મેળવવાના ચસકામાં ટ્રાફિક કાયદાઓની તમામ મર્યાદાઓ વટાવી દીધી હતી. અંડરપાસ જેવા સાંકડા અને જોખમી વિસ્તારમાં ગાડીની સ્પીડ 180 સુધી પહોંચાડીને તેણે આ વિડીયો શૂટ કર્યો હતો. ઓવરસ્પીડિંગનો આ વિડીયો સોશિયલ મીડિયામાં વાયરલ થતાં જ લોકોમાં ભારે રોષ જોવા મળી રહ્યો છે અને આવા બેફામ ડ્રાઇવિંગ કરનારા સામે આકરા પગલાં ભરવાની માગ ઉઠી છે.

પોલીસ પ્રશાસન અને સીસીટીવીની કામગીરી સામે ગંભીર સવાલો

આ ઘટના બાદ મહેસાણા પોલીસ અને સ્માર્ટ સિટી પ્રશાસનની કામગીરી સામે ગંભીર સવાલો ઊભા થયા છે. શહેરમાં ઠેર-ઠેર લગાવેલા પ્રશાસનના સીસીટીવી કેમેરા અને ચારરસ્તા પર તૈનાત ટ્રાફિક પોલીસની હાજરી છતાં આ નબીરો આટલી બેફામ ઝડપે કાર દોડાવી કેવી રીતે નીકળી ગયો તે એક મોટો પ્રશ્ન છે. પોલીસ તંત્રનું નાક વાઢીને વાયરલ થયેલા આ વિડીયો બાદ હવે તંત્ર ઊંઘમાંથી જાગીને આ કારચાલક સામે કડક કાયદેસરની કાર્યવાહી કરે છે કે કેમ તેના પર સૌની નજર ટકેલી છે.

આ પણ વાંચો : Gandhinagar News : OPS મામલે ગુજરાત રાજ્ય કર્મચારી મહામંડળ આક્રમક, CM ને આપ્યું અલ્ટિમેટમ, મોટા આંદોલનની ચીમકી