Narmada News: સેલંબા ગામમાં યુવકને ભ્રષ્ટાચારની ફરિયાદ કરવી મોંઘી પડી, મહિલાઓએ વરઘોડો કાઢી થાંભલે બાંધીને માર માર્યો

ગુજરાતમાં અત્યાર સુધીમાં ચોર, પ્રેમી પંખીડા અને મહિલાઓને તાલિબાની સજાના બનાવો વધુ પડતા સામે આવતા હોય છે. ત્યારે નર્મદાના સેલંબા ગામમાં મહિલાઓએ એક વ્યક્તિનો વરઘોડો કાઢીને તેને થાંભલે દોરડાથી બાંધીને માર માર્યો હોવાની ઘટના સામે આવી છે. આ ઘટનામાં મહિલાઓ સામે પોલીસ ફરિયાદ કરવામાં આવી છે.

થાંભલા સાથે દોરડાથી બાંધી યુવકને માર માર્યો

પ્રાપ્ત વિગતો પ્રમાણે નર્મદાના સેલંબા ગામમાં એક વ્યક્તિએ ભ્રષ્ટાચાર મુદ્દે ફરિયાદ કરતાં મહિલાઓ વિફરી હતી.આ મહિલાઓએ ગામમાં જાહેર રસ્તા પર આ વ્યક્તિને માર મારીને તેનો વરઘોડો કાઢ્યો હોય તેમ ધક્કે ચઢાવ્યો હતો. ત્યાર બાદ તેને દોરડાથી થાંભલે બાંધીને સેલંબા પંચાયતની મહિલા સભ્યએ માર માર્યો હોવાનો આક્ષેપ કરવામાં આવ્યો છે.

સાગબારા પોલીસમાં મહિલાઓ વિરુદ્ધ ફરિયાદ

આ વ્યક્તિને થાંભલે બાંધીને માર મારવામાં આવ્યો હતો. આ ઘટનામાં સેલંબાની મહિલાઓ અને પંચાયતની મહિલા સભ્ય સામે પીડિત યુવકે ભ્રષ્ટાચારની ફરિયાદ કરતાં માર માર્યો હોવાનો આક્ષેપ કર્યો હતો. આ સમગ્ર મામલે સાગબારા પોલીસ સ્ટેશનમાં પીડિત યુવકે ફરિયાદ નોંધવતા પોલીસે મહિલાઓ સામે વધુ તપાસ હાથ ધરી છે. મહિલાઓ જ્યારે આ યુવકને મારતી હતી ત્યારે ગામમાં લોકોના ટોળા એકઠા થયા હતાં.