નવસારી જિલ્લાના વાંસદા તાલુકામાં આવેલા પ્રસિદ્ધ ઉનાઈ ગામમાં કૃષ્ણ જન્મોત્સવ પ્રસંગે યોજાયેલા દહીહાંડી ઉત્સવ દરમિયાન એક અત્યંત શરમજનક અને આસ્થાને ઠેસ પહોંચાડતી ઘટના સામે આવી છે. ધાર્મિક પર્વ જન્માષ્ટમી દરમિયાન દહીહાંડીની મટકી સાથે અમુક ટીખળખોરોએ દારૂની બોટલો લટકાવી દીધી હતી. પવિત્ર તહેવાર પર આવી હરકત થતાં સ્થાનિક લોકો અને હિન્દુ સમાજની લાગણી ગંભીર રીતે દુભાઈ હતી.
વીડિયો અને તસવીરો વાયરલ થતાં મચ્યો હોબાળો
દહીહાંડી સાથે દારૂની બોટલો લટકાવેલી હોવાની તસવીરો અને વીડિયો સોશિયલ મીડિયા પર ઝડપથી વાયરલ થવા લાગ્યા હતા. ધાર્મિક ઉત્સવની મર્યાદા અને આસ્થા સામે સવાલો ઉભા કરતી આ તસવીરો સામે આવતા જ લોકોમાં ભારે રોષ જોવા મળ્યો હતો. મામલો ઉગ્ર બનતા વાંસદા પોલીસ તાત્કાલિક હરકતમાં આવી હતી.
