આણંદ જિલ્લાના પેટલાદ શહેરમાં અસામાજિક પ્રવૃત્તિઓ અને ગેરકાયદેસર જુગારના અડ્ડાઓ પર નેસ્તનાબૂદ કરવા માટે સ્થાનિક પોલીસે કમર કસી છે. પેટલાદ શહેરના અત્યંત વ્યસ્ત અને ભરચક ગણાતા કલાલ પીપળ નજીક આવેલા કુંભારવાડા વિસ્તારમાં કેટલાક શખ્સો જાહેરમાં જુગાર રમી રહ્યા હોવાની ચોક્કસ બાતમી પેટલાદ શહેર પોલીસને મળી હતી. બાતમીના આધારે પોલીસ સબ ઈન્સ્પેક્ટર અને તેમની ટીમે ખાનગી રાહે વોચ ગોઠવીને કુંભારવાડા વિસ્તારમાં એકાએક રેડ કરી હતી.
જાહેરમાં પત્તા ટીચતા જુગારીઓમાં મચી નાસભાગ
પોલીસ કાફલો અચાનક ત્રાટકતા જ કુંભારવાડાના ખુલ્લા મેદાનમાં કુંડાળું વળીને બેઠેલા જુગારીઓમાં ભારે નાસભાગ અને અફરાતફરી મચી ગઈ હતી. જો કે, પોલીસે ચતુરતાપૂર્વક આખા વિસ્તારને કોર્ડન કરી લીધો હતો, જેના કારણે જુગાર રમી રહેલા ૭ ઈસમોને ભાગવાની કોઈ તક મળી ન હતી. પોલીસે સ્થળ પરથી જુનેદબેગ મિર્ઝા, ઉફરાન મલેક, ચિરાગ રાણા, મનીષ રાણા, વિરલ રાણા, ચંદ્રકાન્ત પ્રજાપતિ અને નવનીત રાણા નામના તમામ સાતેય આરોપીઓને કાયદેસર રીતે રાઉન્ડઅપ કરી લીધા હતા.
