પોરબંદર જિલ્લામાં અવિરતપણે ચાલતા ગેરકાયદેસર ખનન અને ખનીજ ચોરી સામે ખાણ ખનીજ વિભાગે લાલ આંખ કરી મોટી કાર્યવાહી હાથ ધરી છે. તંત્રને ચોક્કસ બાતમી મળતાં જ ખાણ ખનીજ વિભાગની ટીમે પોરબંદરના પાતા અને ગોરસર ગામે અચાનક દરોડા પાડ્યા હતા. વિભાગના આ અણધારી સરપ્રાઈઝ ચેકિંગથી ગેરકાયદેસર ખનન પ્રવૃત્તિઓ સાથે સંકળાયેલા ભૂમાફિયાઓ અને સંચાલકોમાં ભારે નાસભાગ અને ફફડાટ મચી ગયો હતો.

પાતા અને ગોરસર ગામેથી 18 મશીનરી જપ્ત

આ સઘન દરોડા દરમિયાન પાતા ગામમાંથી ખનન માટે વપરાતા 3 ટ્રેક્ટર અને 6 ચકડી મશીન જપ્ત કરવામાં આવ્યા હતા. આ ઉપરાંત, ગોરસર ગામેથી પણ વધુ 9 ચકડી મશીનો ઝડપી પાડવામાં આવ્યા હતા. આમ, બંને સ્થળોએથી કુલ મળીને 18 ગેરકાયદેસર મશીનરીઓ અને વાહનો કબ્જે કરવામાં આવ્યા છે. ખાણ ખનીજ વિભાગ દ્વારા જપ્ત કરવામાં આવેલા આ તમામ સાધનો અને મુદ્દામાલની અંદાજિત કિંમત રૂપિયા 20 લાખ જેટલી આંકવામાં આવી છે.

ગેરકાયદેસર ખનન કરનારા સંચાલકો સામે કાયદેસરની કડક કાર્યવાહી

બંને સ્થળોએથી ઝડપાયેલી મશીનરીઓને સીઝ કરીને સુરક્ષિત સ્થળે ખસેડવામાં આવી છે. ગેરકાયદેસર રીતે પથ્થર કે ખનીજનું ઉત્ખનન કરી સરકારી તિજોરીને નુકસાન પહોંચાડનારા ખનન સંચાલકો સામે ખાણ ખનીજ વિભાગ દ્વારા કાયદેસરની કાર્યવાહી હાથ ધરવામાં આવી છે. આગામી દિવસોમાં પણ જિલ્લામાં ચાલતા આવા બિનઅધિકૃત ખનન સામે કડક ઝુંબેશ ચાલુ રાખવામાં આવશે તેવી સ્પષ્ટ ચેતવણી તંત્ર દ્વારા આપવામાં આવી છે.

આ પણ વાંચો : Rajkotના આહિર ચોકમાં સનસનાટી, પિતાએ જ ઘરમાં જુવાનજોધ પુત્રની હત્યા કરી