રાજકોટ શહેર પોલીસ દ્વારા કાયદો અને વ્યવસ્થાની સ્થિતિ મજબૂત બનાવવા માટે લાંબા સમયથી ફરાર હોય તેવા વોન્ટેડ આરોપીઓ સામે વિશેષ ઝુંબેશ ચલાવવામાં આવી રહી છે. આ જ ક્રમમાં રાજકોટ ક્રાઈમ બ્રાન્ચને એક મોટી સફળતા મળી છે. બનાવટી દસ્તાવેજો તૈયાર કરવાના અને આચરવાના એક ગંભીર ગુનામાં છેલ્લા 11 વર્ષથી લાંબા સમયથી કાયદાની પકડથી દૂર ભાગતા ફરાર આરોપીને પોલીસે મુંબઈથી દબોચી લીધો છે.
મુંબઈ સેન્ટ્રલ ખાતેથી ઝડપાયો નિમેશ શાહ
પોલીસ સૂત્રો દ્વારા મળતી માહિતી મુજબ, આ પ્રકરણમાં મુખ્ય આરોપી નિમેશ શાહ લાંબા સમયથી પોતાનું સરનામું બદલીને અલગ-અલગ જગ્યાએ છુપાઈને રહેતો હતો. રાજકોટ ક્રાઈમ બ્રાન્ચની ટીમને આ આરોપી વિશે ચોક્કસ બાતમી મળી હતી, જેના આધારે ટેક્નિકલ સર્વેલન્સ અને હ્યુમન ઇન્ટેલિજન્સની મદદથી મુંબઈ સેન્ટ્રલ વિસ્તારમાં વોચ ગોઠવવામાં આવી હતી. પોલીસે બાતમીના આધારે રેડ કરીને ફરાર આરોપી નિમેશ શાહની આખરે ધરપકડ કરી લીધી છે.
