રાજકોટ શહેરના અત્યંત ધમધમતા ગણાતા પારેવડી ચોક ખાતે એક હૃદયદ્રાવક અને ગમખ્વાર અકસ્માત સર્જાયો છે. ડીજે સાઉન્ડ સિસ્ટમ ભરીને આવતા એક આઈશર ટેમ્પોના ચાલકે પૂરપાટ અને બેફામ ઝડપે વાહન હંકારીને માર્ગ પરથી પસાર થઈ રહેલા અનેક વાહનોને કચડી નાખ્યા હતા. આ ટેમ્પોએ બે ઓટોરીક્ષા તેમજ બે થી ત્રણ મોટરસાઈકલ ચાલકોને જોરદાર અડફેટે લેતાં સ્થળ પર ભારે અફરાતફરી અને ચીસિયારીઓ મચી ગઈ હતી.
1 નું સ્થળ પર જ નીપજ્યું મોત, 3 થી વધુ લોકો ગંભીર રીતે ઈજાગ્રસ્ત
આ દર્દનાક દુર્ઘટનામાં એક પુરુષ વાહનચાલકનું ઘટનાસ્થળે જ કરુણ મોત નીપજ્યું હતું, જ્યારે 3 થી વધુ લોકો ગંભીર રીતે ઈજાગ્રસ્ત થયા હતા. અકસ્માત સર્જાતાં જ આસપાસના વેપારીઓ અને સ્થાનિક લોકો મદદ અર્થે દોડી આવ્યા હતા. ઈજાગ્રસ્ત થયેલા તમામ લોકોને તાત્કાલિક 108 એમ્બ્યુલન્સ મારફતે સારવાર અર્થે નજીકની હોસ્પિટલમાં ખસેડવામાં આવ્યા છે.