રાજકોટ જિલ્લાના આટકોટ તાલુકાના જંગવડ ગામમાં ડબલ મર્ડરની ઘટના સામે આવતાં ચકચાર મચી ગઈ છે. ગામમાં પ્રકાશભાઈ ઘોડકીયા અને તેમનાં પત્ની વિલાસબેનની હત્યા કરવામાં આવી છે. આ મામલે અશોક ઘોડકીયા નામના શખ્સ પર હત્યા કરવાનો આક્ષેપ કરવામાં આવ્યો છે. ઘટનાને પગલે પોલીસે તપાસ તેજ કરી છે.

નશાની હાલતમાં આવી હુમલો કર્યાનો આક્ષેપ

મૃતકના સંબંધીઓએ આપેલા નિવેદન મુજબ, અશોક ઘોડકીયા નામનો શખ્સ નશાની હાલતમાં આવ્યો હતો અને તેણે પતિ-પત્ની પર બોથડ પદાર્થ વડે એક પછી એક ઘા ઝીંક્યા હતા. આ હુમલામાં પ્રકાશભાઈ અને તેમનાં પત્ની વિલાસબેનનું મોત નીપજ્યું હતું.

અગાઉ કોઈ મનદુઃખ કે બોલાચાલી નહોતી

મૃતકના સંબંધીઓએ જણાવ્યું હતું કે અગાઉ બંને પક્ષો વચ્ચે કોઈપણ પ્રકારનું મનદુઃખ કે બોલાચાલી થઈ નહોતી. આમ છતાં અચાનક બનેલી આ ઘટનાથી પરિવારજનો અને ગ્રામજનોમાં આઘાત ફેલાયો છે.

પોલીસે તપાસ તેજ કરી

જંગવડ ગામમાં બનેલી આ બેવડી હત્યાની ઘટનાને પગલે પોલીસ દ્વારા તપાસ હાથ ધરવામાં આવી છે. હત્યા પાછળનું કારણ શું છે અને સમગ્ર ઘટનામાં અન્ય કોઈની સંડોવણી છે કે કેમ તે સહિતના મુદ્દે પોલીસ તપાસ કરી રહી છે. 


આ પણ વાંચો :   Cyclone Akvan Live : ભીષણ વાવાઝોડા અકવાનનું લેન્ડફોલ શરૂ, આગામી 3 કલાક સુધી ચાલશે ભારે તોફાન