રાજકોટ જિલ્લાના જેતપુરમાં પોલીસ અને બુટલેગર વચ્ચે ઘર્ષણની ગંભીર ઘટના સામે આવી છે. ચોક્કસ બાતમીના આધારે પોલીસે કાર્યવાહી કરીને દેશી દારૂનો જથ્થો લઈને જતી એક કારને કોર્ડન કરી ઝડપી પાડી હતી. પોલીસની સરપ્રાઈઝ ચેકિંગ ઓપરેશન દરમિયાન બુટલેગરનો ગેરકાયદે દારૂનો કાળો કારોબાર ખુલ્લો પડી ગયો હતો.
ભાગવાના પ્રયાસમાં પોલીસ જવાન પર છરીથી હુમલો
પોલીસે કારને ઘેરી લેતા જ પકડાઈ જવાના ડરથી બુટલેગરે સ્થળ પરથી ભાગવાનો નિષ્ફળ પ્રયાસ કર્યો હતો. આ દરમિયાન પોતાની ફરજ પર તૈનાત પોલીસ કોન્સ્ટેબલ નિલેશ મકવાણાએ તેને રોકવાનો પ્રયત્ન કરતા બુટલેગરે તેમના પર છરી વડે હુમલો કરી દીધો હતો. આ હુમલામાં કોન્સ્ટેબલ નિલેશ મકવાણાને હાથના ભાગે ગંભીર ઈજાઓ પહોંચી હતી, જેથી તેમને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા હતા.