Rajkot News: ઘરકંકાસથી કંટાળેલા પિતાએ પુત્રીને પોતાની સાથે બાંધી ભાદર નદીમાં ઝંપલાવ્યું

રાજકોટ જિલ્લામાં ગૃહકંકાસથી કંટાળેલા પિતાએ 6 વર્ષની પુત્રી સાથે ભાદર નદીમાં ઝંપલાવી આપઘાત કરી લેતા સમગ્ર પંથકમાં ચકચાર મચી જવા પામી છે. પિતાએ પુત્રીને પોતાની સાથે કપડાથી બાંધીને ધોરાજી-જામકંડોરણા વચ્ચે ભાદર નદીમાં કૂદીને જીવન ટૂંકાવ્યું હતું.ભાદર નદીના પુલ નીચેથી બન્નેના મૃતદેહ મળ્યા હતાં. મૃતદેહને પોસ્ટમોર્ટમ માટે હોસ્પિટલ ખસેડવામાં આવ્યા છે. બનાવના પગલે જામકંડોરણા પોલીસ મથકનો સ્ટાફ ઘટના સ્થળે દોડી ગયો હતો.

પિતાએ પોતાની સાથે પુત્રીને કપડાંથી બાંધી આપઘાત

પ્રાપ્ત વિગતો પ્રમાણે જૂનાગઢ સુખનાથ ચોક વિસ્તારમાં રહેતા અને પીપર-ચોકલેટની એજન્સી ધરાવતા ફૈઝલ ગાર વિજળીવાળા નામના આધેડ તેની 6 વર્ષની પુત્રી ફાતિમાને ઘરેથી આંટો મારવા બાઈક પર લઈને નીકળ્યા હતા. તેઓ મોડી રાત સુધી ઘરે પરત ન ફરતા પરિવારજનોએ શોધખોળ હાથ ધરી હતી.પરંતુ કોઈ ભાળ મળી ન હતી. દરમ્યાન ગઈકાલ સવારે ભાદર નદીમાંથી કપડાથી બાંધેલા એકબીજાને ભેટેલા અવસ્થામાં પિતા-પુત્રીની લાશ મળી આવતા પરિવારમાં અરેરાટી વ્યાપી જવા પામી હતી. જામ કંડોરણા પોલીસ મથકના પીઆઈ રોહિત વાઢીયા સહિતનો સ્ટાફ ઘટના સ્થળે દોડી ગયો હતો.

ઘરકંકાસ તથા પુત્રીની બિમારીથી સતત તણાવમાં રહેતો

પોલીસે પિતા-પુત્રીના મૃતદેહ નદીમાંથી બહાર કાઢી ફોરેન્સિક પીએમ કરાવવા સિવિલ હોસ્પિટલમાં ખસેડી તપાસ હાથ ધરી હતી. આ દરમિયાન મૃતક ફૈઝલના ખિસ્સામાંથી એક સ્યુસાઈટ નોટ મળી આવી હતી. જેમાં કોઈનો કાંઈ વાંક નથી હું મારી જાતે જ પગલું ભરૂ છું તેવું લખ્યું હતું. પોલીસની પ્રાથમિક તપાસમાં મૃતક ચાર ભાઈમાં નાનો હતો. તેને સંતાનમાં એક પુત્રી હતી. તે ઘરકંકાસ તથા પુત્રીની બિમારીથી સતત તણાવમાં રહેતો હતો. જેથી કંટાળીને આ પગલું ભર્યું હોવાનું સામે આવ્યું છે.