રાજકોટ શહેરના પોશ વિસ્તાર ગણાતા કાલાવડ રોડ પર આવેલા કોસ્મો કોમ્પ્લેક્ષના 5મા માળે આવેલા 'ફ્લોરેન્સ વેલનેસ સ્પા' (Florance Wellness Spa) માં મસાજની આડમાં ગેરકાયદેસર દેહવ્યાપારનો કારોબાર ચાલતો હોવાની ચકચારી ઘટના સામે આવી છે. રાજકોટ પોલીસના એન્ટી હ્યુમન ટ્રાફિકિંગ યુનિટ (AHTU) ને આ અંગે ચોક્કસ અને સચોટ બાતમી મળી હતી, જેના આધારે પોલીસે તાત્કાલિક ધોરણે આ વિસ્તારમાં દરોડાની યોજના ઘડી હતી.
AHTU એ ડમી ગ્રાહક મોકલીને કરી કાર્યવાહી
ગેરકાયદેસર નેટવર્કનો પર્દાફાશ કરવા માટે એન્ટી હ્યુમન ટ્રાફિકિંગ યુનિટે એક ડમી ગ્રાહક મોકલીને ખાતરી કરી હતી. મસાજના નામે અનૈતિક કામગીરી થતી હોવાની પુષ્ટિ થતાં જ પોલીસે સ્પા પર અચાનક દરોડો પાડ્યો હતો. દરોડા દરમિયાન પોલીસે અંદરથી 3 પીડિત યુવતીઓને મુક્ત કરાવી સન્માનજનક રીતે રેસ્કયૂ કરી હતી. સ્પામાં ખાસ ગુપ્ત કેબિનો બનાવીને આ ગેરકાયદેસર ધંધો ચલાવવામાં આવતો હોવાનું સામે આવ્યું છે.