અમદાવાદ ગ્રામ્ય પોલીસમાં પોલીસ કર્મચારીઓની કામગીરીને લઈને મોટી કાર્યવાહી કરવામાં આવી છે. સાણંદ પોલીસ સ્ટેશનમાં ફરજ બજાવતા 12 પોલીસ કર્મચારીઓની તાત્કાલિક સામૂહિક બદલી કરવામાં આવી છે.
અમદાવાદ ગ્રામ્ય SP દ્વારા કરવામાં આવેલી કાર્યવાહીમાં 4 PSI, 2 ASI, 4 હેડ કોન્સ્ટેબલ અને 2 પોલીસ કોન્સ્ટેબલનો સમાવેશ થાય છે. તમામની તાત્કાલિક બદલીના આદેશ કરવામાં આવ્યા છે.
સાણંદ પોલીસ સ્ટેશનમાં પોલીસ કર્મચારીઓની કામગીરીના ઇન્સ્પેક્શન દરમિયાન બોડી વોર્ન કેમેરાને લઈને બેદરકારી સામે આવી હોવાનું જાણવા મળ્યું છે. તપાસ દરમિયાન કેટલાક પોલીસ કર્મચારીઓએ બોડી વોર્ન કેમેરા લગાવ્યા ન હોવાનું સામે આવ્યું હતું.
માત્ર બોડી વોર્ન કેમેરા જ નહીં, પરંતુ પોલીસ પેટ્રોલિંગની કામગીરીમાં પણ બેદરકારી સામે આવી હોવાની માહિતી છે. પોલીસની ફિલ્ડ ડ્યુટી અને પેટ્રોલિંગ વ્યવસ્થાને લઈને થયેલા ઇન્સ્પેક્શન બાદ ઉચ્ચ અધિકારીઓ દ્વારા આ કાર્યવાહી કરવામાં આવી છે.
અમદાવાદ ગ્રામ્ય SPના ઇન્સ્પેક્શન દરમિયાન બેદરકારી સામે આવ્યા બાદ સમગ્ર મામલે તાત્કાલિક નિર્ણય લેવામાં આવ્યો છે. સાણંદ પોલીસ સ્ટેશનના 12 કર્મચારીઓની સામૂહિક બદલીને કારણે પોલીસ તંત્રમાં પણ ચર્ચા શરૂ થઈ છે.
આ કાર્યવાહીને પોલીસ કર્મચારીઓની ફરજ દરમિયાનની જવાબદારી અને નિયમોના પાલન અંગે કડક સંદેશ તરીકે જોવામાં આવી રહી છે. ખાસ કરીને બોડી વોર્ન કેમેરા અને પેટ્રોલિંગ જેવી કામગીરીમાં બેદરકારી સામે ઉચ્ચ અધિકારીઓએ તાત્કાલિક કાર્યવાહી કરી છે.
આ પણ વાંચો : PM Modiના નારામાં અંગ્રેજીની એન્ટ્રી, ‘We Will Do It’ પાછળનો સંદેશ શું? વાંચો રસપ્રદ માહિતી