સુરત મનપા કે પોલીસની આડમાં રોફ જમાવતા હોમગાર્ડના જવાન શિવાજી ઉર્ફે શિવા ગોરખ ઉગલે દ્વારા વર્ષ 2018માં એક મહિલા પાસે લાંચ માંગવામાં આવી હોવાની સત્તાવાર ફરિયાદના આધારે આ ધરપકડ કરવામાં આવી છે. આ કેસ સાબિત કરે છે કે જો તમારી પાસે મજબૂત ડિજિટલ પુરાવા હોય, તો કાયદો ગુનેગારને ગમે ત્યારે પાતાળમાંથી પણ શોધી કાઢે છે.
આખો મામલો અને લાંચની મજબૂત કડી
વર્ષ 2018માં સુરતમાં એક મહિલા વિરૂદ્ધ પ્રોહિબિશન (વિદેશી દારૂ) નો ગુનો નોંધાયો હતો. આ કેસની તપાસ અને પ્રક્રિયા દરમિયાન હોમગાર્ડ જવાન શિવાજી ઉગલેએ વચેટિયા અથવા વગદારની ભૂમિકા ભજીને મહિલાના પરિવારનો સંપર્ક કર્યો હતો. શિવાજીએ ધમકી આપી હતી કે જો તેઓ રૂપિયા 10,000 ની લાંચ નહીં આપે, તો પોલીસ મહિલાની ધરપકડ કરશે અને તેને જેલમાં કડક હેરાનગતિ કરવામાં આવશે. જો લાંચ આપી દેશે તો તેને પોલીસ પકડમાંથી બચાવી લેવાશે. મહિલાનો પરિવાર લાંચ આપવા માંગતો ન હોવાથી, મહિલાના જાગૃત પુત્રએ હોમગાર્ડ શિવાજી સાથે થયેલી લાંચની આખી વાતચીત પોતાના મોબાઈલમાં ગુપ્ત રીતે રેકોર્ડ કરી લીધી હતી અને તેની ઓડિયો સીડી (CD) બનાવી સુરત એસીબીને સોંપી દીધી હતી.
