સુરત શહેરમાં માસૂમ બાળાઓ અને મહિલાઓની સુરક્ષા સામે સવાલિયા ચિહ્નો ઊભા કરતી ઘટનાઓ વચ્ચે ન્યાયતંત્ર દ્વારા આવા રાક્ષસી માનસિકતા ધરાવતા તત્વોને પાઠ ભણાવતો એક ઐતિહાસિક ચુકાદો આપવામાં આવ્યો છે. સુરતના ચોક બજાર વિસ્તારમાં અગાઉ એક 4 વર્ષની બાળકી રમી રહી હતી ત્યારે આરોપી અંકિત ગૌતમ તેની માસૂમિયતનો લાભ ઉઠાવી, ફોસલાવીને અપહરણ કરી ગયો હતો. ત્યારબાદ આ નરાધમે બાળકી સાથે હેવાનિયતની તમામ હદો વટાવીને દુષ્કર્મ આચર્યું હતું. આ કેસમાં સુરતની સ્પેશિયલ પોક્સો (POCSO) કોર્ટે આરોપીને સમાજ માટે કલંક ગણાવી કડક સજા સંભળાવી છે.
સુરત પોક્સો કોર્ટનો ઐતિહાસિક ચુકાદો
સામાન્ય રીતે આજીવન કેદની સજામાં 14 વર્ષ કે ચોક્કસ ગાળા બાદ માફીની અરજી કે વહેલી મુક્તિની જોગવાઈઓ હોતી હોય છે, પરંતુ નામદાર કોર્ટે આ કેસની ક્રૂરતા જોઈને ચુકાદામાં સ્પષ્ટ આદેશ કર્યો છે કે આરોપી અંકિત ગૌતમ જ્યાં સુધી જીવતો રહેશે એટલે કે તેના શરીરના અંતિમ શ્વાસ સુધી તે જેલની અંદર જ રહેશે. તેને સામાન્ય કેદની કોઈ માફીનો લાભ મળશે નહીં. અદાલતે નોંધ્યું હતું કે 4 વર્ષની બાળકી પર આવું કૃત્ય કરનાર વ્યક્તિ સમાજમાં રહેવાને લાયક નથી.
