સુરતમાં નાની-નાની બાબતો અને નજીવી રકમની લેતી-દેતીમાં હત્યા જેવા ગંભીર ગુનાઓ વધતા જાય છે, ત્યારે ડિંડોલી વિસ્તારમાં રૂપિયા 5,000ની ઉઘરાણી મામલે એક યુવકની ઘાતકી હત્યા કરાતા ચકચાર મચી ગઈ હતી. ડિંડોલી પોલીસ સ્ટેશનની હદમાં બનેલી આ ઘટનામાં મૃતક રાજ દુબેએ આરોપીઓને અગાઉ મિત્રતાના દાવે રૂપિયા 5,000 ઉધાર આપ્યા હતા. આ રકમ લાંબા સમયથી પરત ન મળતા રાજે આરોપીઓ પાસે પોતાના પૈસાની માંગણી કરી હતી.
ડિંડોલીમાં સનસનાટીભરી હત્યાનો ભેદ ઉકેલાયો
પોલીસની પ્રાથમિક તપાસમાં બહાર આવેલા વિગત મુજબ, રાજ દુબે જ્યારે પોતાના 5,000પરત માંગી રહ્યો હતો, ત્યારે આરોપીઓ પૈસા આપવા મુદ્દે આનાકાની કરી રહ્યા હતા. આ બાબતને લઈને બંને પક્ષો વચ્ચે ઉગ્ર બોલાચાલી અને તકરાર થઈ હતી. બોલાચાલી દરમિયાન આવેશમાં આવી ગયેલા આરોપીઓએ રાજ દુબે પર જીવલેણ હુમલો કરી દીધો હતો, જેમાં ગંભીર ઈજાઓ થવાના કારણે રાજ દુબેનું મોત નીપજ્યું હતું. હત્યાની આ ઘટનાને અંજામ આપીને ત્રણેય આરોપીઓ ઘટનાસ્થળેથી ફરાર થઈ ગયા હતા.