સુરત શહેરમાં હીરાના વ્યવસાય સાથે સંકળાયેલા વેપારીઓને રોકાણની મોટી લાલચો આપી કરોડો રૂપિયા પડાવી લેતી ગેંગનો સુરત પોલીસની ઇકો સેલે પર્દાફાશ કર્યો છે. અડાજણ વિસ્તારમાં રહેતા અને ફર્નિચરના બિઝનેસ ઉપરાંત વરાછા શ્રેયસ ડાયમંડમાં 'મનરોસો ઇમ્પેક્ષ પ્રા.લી.' ના નામે હીરાનો વેપાર કરતા કેતન ભીખાલાલ પટેલે આ અંગે ફરિયાદ નોંધાવી હતી. આ કેસની તપાસ સુરત પોલીસ કમિશનર દ્વારા ઇકો શેલને સોંપવામાં આવતા પોલીસે ત્વરિત કાર્યવાહી કરી બે મુખ્ય આરોપીઓની ધરપકડ કરી લીધી છે.
સુરતમાં લેબગ્રોન ડાયમંડના નામે કરોડોનું ફુલેકું
સમગ્ર ઘટનાની વિગત એવી છે કે, વર્ષ 2021 માં ફરિયાદી કેતન પટેલનો સંપર્ક તેમના મિત્ર રોહિત બલર મારફતે વેદ રોડ ખાતે આવેલી 'એશિયન લેબગ્રોન ડાયમંડ એલએલેપી' ના ભાગીદાર સંદીપ જસાણી સાથે થયો હતો. સંદીપ જસાણીએ કેતનભાઈને લેબગ્રોન ડાયમંડના બિઝનેસમાં બહુ મોટી કમાણી હોવાની વાત કરી હતી. ત્યારબાદ સંદીપે અન્ય ભાગીદારો ઘનશ્યામ જસાણી, અંકુશ નાકરાણી અને ઉમેશ નાકરાણી સાથે મુલાકાત કરાવીને પોતાની કંપનીમાં લેબગ્રોન હીરા બનાવવાની મશીનરી મુકાવવા માટે પ્રેરિત કર્યા હતા. આરોપીઓની વાતોમાં આવી જઈને કેતનભાઈએ અમેરિકા રહેતા પોતાના બહેન અને જીજાજી પાસેથી મોટી રકમ મંગાવીને આ કંપનીમાં કુલ 3.50 કરોડ રૂપિયાનું રોકાણ કર્યું હતું.