સુરત જિલ્લાના કીમ વિસ્તારમાંથી વાલીઓ માટે અત્યંત ચેતવણીરૂપ અને લાલબત્તી સમાન એક ચોંકાવનારો કિસ્સો પ્રકાશમાં આવ્યો છે. કીમમાં ગરબા ક્લાસ ચલાવતા એક સંચાલકે તેના જ ક્લાસમાં આવતી એક સગીર વયની દીકરીને પ્રેમની જાળમાં ફસાવી હતી. ત્યારબાદ આ સંચાલક સગીરાને ભગાડી ગયો હતો અને કાયદાની આંખમાં ધૂળ નાખીને તેની સાથે લગ્ન પણ કરી લીધા હતા. આ સમગ્ર મામલો સામે આવ્યા બાદ સગીરાના વાલીના પગ તળેથી જમીન સરકી ગઈ હતી અને તેમણે આ અંગે પોલીસ સ્ટેશનમાં ફરિયાદ નોંધાવી હતી.
લગ્નની સત્તાવાર નોંધણી પણ કરાવી લીધી
મળતી વિગતો અનુસાર, મૂળ ઉત્તર પ્રદેશના જોનપુરનો વતની અને હાલ કીમમાં રહેતો ગરબા ક્લાસનો સંચાલક દેવેશ ઉર્ફે દેવસર પાંડે સગીરા સાથે લગ્ન કરવા માંગતો હતો.કાયદેસર રીતે સગીરાની ઉંમર લગ્ન લાયક ન હોવાથી તેણે કાયદામાંથી બચવા માટે એક મોટું ષડયંત્ર રચ્યું હતું.દેવેશે સગીરાને પુખ્ત વયની દર્શાવવા માટે તેનો જન્મનો ખોટો અને બોગસ દાખલો બનાવડાવ્યો હતો.આ ગુનાહિત કૃત્યમાં તેણે પોતાના મિત્ર સંજીત યાદવની મદદ લીધી હતી અને આ જ નકલી દસ્તાવેજના આધારે લગ્નની સત્તાવાર નોંધણી પણ કરાવી લીધી હતી.